Foto: baq.kz
Seisenbi kúni Úkimet úiinde Memleket basshysy Qasym-Jomart Toqaevtyń tóraǵalyǵymen Qazaqstan Respýblikasy Úkimetiniń keńeitilgen otyrysy ótip, onda QR Premer-ministri Oljas Bektenov azamattardyń jalaqasyn kóterý týraly josparmen bólisti, dep habarlaidy Ult.kz.
Ol óz sózinde halyqtyń tabysy ekonomikanyń ósý qarqynyna ilese almai otyrǵanyn aityp, eńbek aqyny 40%-ǵa jetkizý kózdelip otyrǵanyn jetkizdi.
"Atap aitý kerek, azamattarymyzdyń tabys deńgeiiniń artýy ekonomikanyń ósý qarqynyna sáikes kelmedi. Eńbekaqynyń jalpy ishki ónimdegi úlesiniń kórsetkishi shamamen 30%-dan asyp tur, bul – Ortalyq Aziiada joǵary kórsetkish. Biraq bizdiń maqsatymyz – álemdik ortasha kórsetkishke – 40%-ǵa jetý", - dedi Oljas Bektenov.
Premer-ministr jalaqynyń ósý qarqyny biznes tabysynyń, onyń ishinde óz kúshimen ári memlekettik qoldaý esebinen alynǵan tabys dinamikasynan artta qalyp otyr dep málimdep, osyǵan orai Úkimet halyqtyń tabysyn arttyrý úshin keshendi sharalardy ázirleýde ekenin jetkizdi.
"Onyń aiasynda qarjylyq, salyqtyq jáne basqa da yntalandyrý sharalary kózdelýde. Olar eńbekaqyny kóterýge, laiyqty jalaqy tóleitin jumys oryndaryn kóbeitýge, kásibi daǵdylar men biliktilikti damytýǵa, sondai-aq azamattar úshin qarjylyq júktemeni azaitýǵa baǵyttalǵan", - dedi Premer-ministr.
Resmi derekterde 2025 jylǵy III toqsanda Qazaqstan Respýblikasy boiynsha ailyq jalaqynyń ortasha máni kórsetilgen. Ulttyq statistika biýrosynyń málimeti boiynsha osy ýaqytta Qazaqstanda ailyq jalaqynyń ortasha máni 429368 teńgeni qurady. Bul 2024 jylǵy tiisti toqsanǵa qaraǵanda 10,0%-ǵa ósken.
