Sýret: freepik
OLX.kz agregatorynan esirtki satýshylardy jaldaý týraly úsh myń “jasyryn” habarlandyrý óshirildi, – dep habarlaidy Polisia.kz.
IIM baspasóz qyzmeti málimetinshe, internettiń damýymen birge kompiýterlik qylmystar, sonyń ishinde esirtkiniń zańsyz ainalymy salasyndaǵy qylmystar beleń ala bastaǵan.
Áleýmettik jeliler men internet-servisterde kýrerlik jumys usynyp nemese jaldamaly jumysshylar qyzmetin qajet etetin habarlandyrýlardyń artynda kei jaǵdaida esirtki biznesi turatyny belgili. Mundai habarlandyrýlardyń qurbany eresek azamattar ǵana emes, kámeletke tolmaǵandar da bolýy múmkin.
"Esirtki jasyrýshylardy jaldaý týraly jarnamalardy anyqtaý úshin vedomstvo eń iri habarlandyrý servisteriniń biri OLX-pen tikelei jumys isteidi.
Jyl basynan beri IIM bastamasy boiynsha kompaniia politsiia men servis qyzmetkerleri anyqtaǵan úsh myńnan astam “jasyryn” habarlandyrýdy alyp tastady. Olardyń artynda esirtki jasyrýshylardy jumysqa tartý usynysy bolǵan.
IIM memlekettik organdardyń, “OLX Group” ókilderiniń jáne eriktilerdiń qatysýymen arnaiy chat qurdy, onda kúdikti habarlandyrýlarǵa siltemeler jiberilip otyrady, jan-jaqty tekserýden keiin rastalǵan jaǵdaida olar dereý joiylady", – dep túsindirdi IIM esirtki qylmysyna qarsy is-qimyl departamenti bastyǵynyń orynbasary Sarqytbai Qusaiynov.
Foto: Polisia.kz
Vedomstvo málimetinshe, politsiia habarlandyrý agregatorlaryn baqylaýdan basqa, esirtkiniń taralýy týraly aqparatty qamtityn saittardy, jazbalardy, blogtardy jáne jarnamalardy anyqtaý úshin internet keńistigine monitoring júrgizedi.
Jyl basynan beri osyndai 2700-den astam internet-resýrs anyqtalǵan. Olar týraly aqparat buǵattaý úshin Mádeniet jáne aqparat ministrligine jiberilgen.
Ishki ister ministrligi internet-resýrstardy paidalana otyryp jasalǵan esirtki qylmystary asa aýyr qylmystar sanatyna jatatynyn eskertedi, olar úshin jaza múlki tárkilenip, 10 jyldan 15 jylǵa deiin bas bostandyǵynan aiyrýdy kózdeidi.
