Dinara men Sultan Aziz qyzdyń anasynan ruqsat alyp baryp bas qosqan.
"Meniń birinshi nekemnen bir qyzym bar, esimi - Elvira. 10 jyl jalǵyzbasty ana boldym. Bizde ajyrasqan balasy bar áielge eshkim úilengisi kelmeidi. Aziz bolsa túsinistikpen qarap men úshin Qazaqstanǵa kóship kelýge daiyn boldy jáne anamnyń aldynan ótti. Óz baqytymdy tapqanymdy baiqaǵan anam batasyn berdi. Ákem dúnieden ótken, tanystyqtan keiin kúieýim ekeýimiz ákemniń ziratyna bardyq. Aziz Quran oqyp, meni jáne qyzymdy qorǵap júretinine ýádesin berdi", - deidi ol.
Aziz qazaq halqynyń dástúrin syilap, qalyńmalyna 10 million teńge bergen.
"Arab elinde qalyńmal degen joq. Olarda ana súti degen bar, syilyqtaryn aparady jáne qyzǵa máhir beredi. Bul aqsha maǵan berilgen máhir. Biraq men kúieýime túsindirdim, sen qazaqtyń qyzyna úilengeli jatyrsyń, bizde qyzdyń qalyńmaly degen bar dep. Kúieýim túsinip, senderdiń salt-dástúrlerińdi syilaimyn dep, anama berdi", - deidi Dinara.
Dinara áleýmettik jelide pikirlerge qalai qaraitynyn aitty.
"It úredi, kerýen kóshedi. Árine, maǵan, marqum ákeme, anama til tigizip jazǵandary aýyr tidi. Meni tanymal bolý úshin videoǵa túsirip, jelige saldy, dep te aiyptap jatyr. Biraq shynynda da, kim jelige salǵanyn bilmeimin, biz ózimiz úshin túsirgen edik. Nazar aýdarmaýǵa barynsha tyrystyq. Áleýmettik jelilerde meniń turmys qurǵanymdy qyzý talqylap jatqanyn bilemin. Árkimniń óz pikirine quqyǵy bar ekenin túsinemin. Biraq tym shekten shyǵyp ketti. Taraz qalasynan Esen esimdi jigit aýdio habarlamalar jiberip, meni, aǵamdy, kúieýimdi óltiremin dep qorqytty. Marqum ákeme de til tigizip jaza bastaǵanda, sotqa baryp aryz jazyp, jazalaýdy talap ettim", - deidi ol.
Dinaranyń kúieýi Sultan Aziz Almatydaǵy Saýd Arabiiasynyń konsýldyǵyna júginbek. Alaida áieli halyqaralyq deńgeide shý shyǵarmai, sál kútýin suraǵan. Onyń aitýynsha, mundai oqiǵa buryn da bolǵan, biraq basqa elde.
Áńgimelesken: Perizat Abdralina
Video kadry: instagram / aqparat.kz
