Búgin Almaty qalasynda Denis Tendi óltirýge qatysty is boiynsha sotqa deiingi tergep-tekserý amaldary bastaldy, dep habarlaidy "Ult aqparat".
Bas prokýratýranyń baspasóz qyzmetiniń habarlaýynsha, qylmystyq isti tergeý úshin IIM jáne IID-niń tájiribeli qyzmetkerlerinen turatyn jedel tergeý toby quryldy.
Is boiynsha protsestik prokýrorlar taǵaiyndaldy. Tergeý barysy Bas Prokýrordyń baqylaýyna alyndy.
Eske sala ketsek, búgin Almatyda tanymal mánerlep syrǵanaýshy Denis Tendi pyshaqtap ketkeni habarlandy.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda búgin túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
