Olimpiada rezervin daiyndaýdyń birtutas júiesin qurý kerek. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Olimpiada rezervin daiyndaýdyń birtutas júiesin qurý ýaqyty keldi. Bul salada túbegeili is-sharalar qabyldaý qajet. Ministrlik, Ulttyq olimpiada komiteti, ákimdikter, ǵylymi institýttar men federatsiialar sportshylardy daiarlaý barysynda ózderiniń mindetteri men rólderin anyq túsinip, olardy tiianaqty oryndaýy tiis. Osy jumysty úilestirý ministrliktiń basty mindeti. Olimpiada rezervin daiarlaý qyzmetin naqty deńgeilerge bólip, árbir deńgei úshin tiisti normativterdi, kórsetkishterdi, jaýapty uiymdardy jáne qarjylandyrý kózderin anyqtaý qajet», - dedi vitse-premer Mádeniet jáne sport ministrliginiń alqa otyrysynda.
Osy rette Eraly Toǵjanov qabiletti sportshylar tiisti normativti oryndaǵannan keiin daiarlyqtyń joǵary deńgeiine ótýi tiis ekendigin basa aitty.
«Jattyqtyrýshylardy óz shákirtterin kelesi deńgeige ótkizgeni úshin marapattaý mańyzdy. Bul máselemen biraz shuǵyldandym. Joǵary deńgeige jetken shákirtterin kópshiligi óz qaramaǵynda ustaýǵa yntaly. Sondyqtan osyndai yntalandyrý júiesinsiz naqty nátije de bolmaýy múmkin. Osy maqsatta arnaiy syiaqy da engizý máselesin pysyqtaýdy tapsyramyn», - dedi ol.
