Bilim jáne ǵylym ministri Ashat Aimaǵambetov mektep oqýshylary arasyndaǵy Olimpiada oiyndary, doktorantýra men magistratýraǵa tapsyrý da elektrondy formatqa kóshkenin málimdedi, - dep habarlaidy "Ult aqparat".
Bul týraly minist Facebook jelisindegi paraqshasynda aitty. Onyń sózinshe, bul ózgeristerdi qoǵam jaqsy qabyldap, qoldaý bildirgen. Ashat Aimaǵambetov biyl elektrondy formatqa kóshken tek UBT emes ekenin aitady.
"Birinshiden, oqýshylardyń pándik Olimpiadasy. Biz biyl aqpan aiynda alǵash ret oqýshylar arasynda respýblikalyq olimpiadany elektrondyq formatta ótkizdik. Ár qatysýshyǵa jeke kompiýter berildi, ár oqýshynyń is-áreketin beinekamera baqylap otyrdy. Sonymen qatar, arnaiy ortalyqta kezekshiler barlyq protsesti qadaǵalai alyp, proktoring júiesi de qoldanyldy. Áleýmettik jelilerde jáne arnaiy portalda ashyq transliatsiia júrgizildi. Buǵan qosa, biz biyl olimpiada tapsyrmalaryn tekserý júiesin de ózgerttik. Buryn qazylar alqasy múshelerine balalardyń jumystary proportsionaldy túrde berilse, endi baǵalaý kezinde sýbektivizmdi tómendetý úshin qazylar alqasynyń ár múshesi bir ǵana tapsyrmany kórip, baǵalai aldy", - deidi ministr.
