Qazaqstandyq London Olimpiadasynyń chempiony Aleksandr Vinokýrov short-trekshi Abzal Ájiǵalievke syilyq jasady. Bul týraly sportshy óziniń Facebook-tegi jeke paraqshasynda jazdy, - dep habarlaidy QazAqparat.
«Men bul kúndi umytpaimyn. Keshegi jazbadan bir kún ótpei, búgin tústen keiin maǵan beitanys nómirden qońyraý shaldy. Ol Aleksandr Vinokýrovtyń ózi bolyp shyqty. Ol meniń jazbamdy oqyp, olimpiadadaǵy joǵary nátijemmen quttyqtaý úshin úiine shaqyrdy. Men úshin onyń qońyraýy tosynsyi boldy. Maǵan @vinobike velosipedin syilaidy dep tipti oilamadym! Álemdik velosporttyń ańyzǵa ainalǵan chempiony jáne naǵyz tulǵa @alexandrvinokurov-qa alǵysymdy aitamyn! Bizdiń sportqa jasap jatqan isterińiz úshin jáne maǵan kórsetken qoldaýyńyz úshin raqmet», - dep jazdy sportshy.
Ájiǵalievke syilaǵan velosiped jańa jeńisterge jetýine septigin tigizetinin tilep, jaýap berdi. «@abzal_azhgaliyev-pen jyly kezdesý boldy. Beijińdegi qysqy olimpiada oiyndarynda laiyqty óner kórsetkeni úshin búkil sport qaýymy atynan alǵys aityp, álem chempionatyna sáttilik tiledim. Bul @Vinobike velosipedi sáttilik ákelip, jeńiske jetýge kómektesedi dep senemin! # teamkz», - dedi Vinokýrov.
Esterińizge sala keteiik, Beijińde ótken Qysqy Olimpiada oiyndarynda Ájiǵaliev 500 metrge júgirýden tórtinshi oryn alǵan bolatyn. Sondai-aq, ol Olimpiadanyń ashylý jáne jabylý saltanatynda Qazaqstan týyn ustap shyqqan edi.
