Olimpiada chempiony, boksshy Daniiar Eleýsinov Almaty halyqaralyq áýejaiyndaǵy oqiǵadan keiin 10 táýlikke ákimshilik qamaýǵa alyndy, dep habarlaidy ult.kz.
Bul týraly Kóliktegi politsiia departamentiniń baspasóz qyzmeti málimdedi.
25 qyrkúiekte Almaty – Astana baǵytyndaǵy reiske otyrý kezinde er adam ushaqtan óz betinshe shyǵyp, perronǵa júgirip ketken. Osylaisha aviatsiialyq qaýipsizdik talaptaryn buzǵan.
Oqiǵaǵa bailanysty qaýipsizdik sharalaryn saqtaý maqsatynda ushaqtaǵy barlyq jolaýshy syrtqa shyǵarylyp, tiisti rásimder júrgizilgen. Sonyń saldarynan reis keshiktirilgen.
Meditsinalyq kýálandyrý nátijesinde er adamnyń jeńil dárejede alkogoldik masań kúide bolǵany anyqtalǵan.
Politsiia málimetinshe, ol Ákimshilik quqyq buzýshylyq týraly kodekstiń bes baby boiynsha jaýapqa tartylǵan. Atap aitqanda, qoǵamdyq orynda mas kúiinde júrý, tyiym salynǵan jerde temeki shegý, ushý qaýipsizdigi talaptaryn buzý, áýe kemesindegi minez-qulyq erejelerin saqtamaý jáne usaq buzaqylyq boiynsha hattamalar toltyrylǵan.
Sot sheshimimen er adam 10 táýlikke ákimshilik qamaýǵa alynǵan.
Quqyq qorǵaý organdary adamnyń mártebesi, tanymaldyǵy nemese burynǵy jetistikteri jaýapkershilikten bosatpaitynyn atap ótti. Zań talaptary barlyǵyna birdei qoldanylady.
