Foto: Aqorda baspasóz qyzmeti
Prezident HHHIII jazǵy Olimpiada oiyndaryna qatysatyn Qazaqstan qurama komandasynyń múshelerine Memlekettik týdy tapsyrdy, -dep habarlaidy "Ult Aqparat" Aqorda baspasóz qyzmetine silteme jasap.
Qasym-Jomart Toqaev Ulttyq qurama sportshylarymen kezdesýde Parijde bastalatyn dúbirli dodany búkil álem asyǵa kútetinin ári oǵan tórtkúl dúnie túgel kóz tigip otyrǵanyn aitty. Sonymen qatar úzdikterdiń úzdigi baq synaityn bairaqty básekege eń myqty sportshylarymyz bara jatqanyn atap ótip, el namysyn qorǵaý abyroily mindet ekenine toqtaldy.
– Biz sizderge zor úmit artamyz. Búkil halqymyz – sizderge jankúier. Jalpy, qazaq sport mektebiniń mártebesi qashanda biik. Sportshylarymyz árdaiym elge júldemen oralyp júr. Osy dańqty joldy abyroimen jalǵaisyzdar dep senemin. Shyn máninde, sizderdiń jeńisterińiz tutas Qazaqstannyń jeńisi bolmaq. Kók týymyz jelbirese, ultymyzdyń rýhy asqaqtaidy, – dedi Memleket basshysy.
Prezident sportshylarymyzǵa barlyq qajetti jaǵdai jasalyp jatqanyna toqtaldy.
– Eldi mekenderde arnaiy alańdar salynyp jatyr. Ótken jyldyń ózinde 70-ke jýyq sport ortalyǵy ashyldy. Biyl taǵy 200-ge jýyq nysan salynady. Barshańyzǵa málim, Ulttyq olimpiada komitetinde ózgerister boldy. Olimpiada oiyndaryna daiyndyq shtaby quryldy. Tájiribeli mamandardy shaqyrdyq. Belgili sportshy Gennadii Golovkin keldi. Ár salada osyndai óz isiniń naǵyz sheberi bolýǵa tiis. Sonda ǵana nátije bolady. Biz – sportshylarǵa airyqsha qurmet kórsetetin elmiz, – dedi Memleket basshysy.
Qazaqstan Prezidenti sport tarihynda óshpes iz qaldyrǵan sańlaqtarymyzdyń eńbegi árqashan joǵary baǵalanatynyn jetkizdi.
– Balýan Sholaq, Qajymuqan Muńaitpasov, Jaqsylyq Úshkempirov, Aleksandr Vinokýrov, Bekzat Sattarhanov, Olga Rypakova atyndaǵy sport nysandary – sonyń aiqyn kórinisi. Sizder de biik belesti baǵyndyra alasyzdar. Men buǵan kámil senemin. Búgingi jastarymyz sizderge qarap boi túzeidi. Bul – úlken abyroi, – dedi Qasym-Jomart Toqaev.
