Uiymdasqan qylmystyq top quramynda zańsyz oiyn biznesin júzege asyrdy dep aiyp taǵylǵan «OLIMP KZ» býkmekerlik keńsesiniń býhgalteri Qazaqstanǵa ekstraditsiialandy, dep habarlaidy "Ult aqparat".
«Búgin Qazaqstannyń Bas prokýratýrasy men Qarjy monitoringi agenttiginiń qyzmetkerleri Qazaqstan Respýblikasynyń azamatshasy Elena Antontsevany Chernogoriiadan ekstraditsiialady.
E. Antontsevaǵa «OLIMP KZ» Býkmekerlik keńsesi» JShS-da býhgalter bolyp jumys istep júrip, uiymdasqan toptyń quramynda memleketke asa iri mólsherde zalal keltirip, oiyn biznesi salasynda zańsyz qyzmetti júzege asyrdy degen kúdik keltirilip otyr», - dedi QR Bas prokýratýrasynyń baspasóz qyzmetinen.
Málim etilgendei, Antontseva qylmys jasaǵannan keiin qylmystyq qýdalaý organdarynan jasyrynǵan.
«Osyǵan bailanysty oǵan halyqaralyq izdeý jariialandy. Qazirgi ýaqytta ol Almaty qalasynyń tergeý izoliatorynda», - dep naqtylady vedomstvodan.
Eske salaiyq, búgin, 17 aqpan kúni Almaty qalasynyń prokýratýrasy «OLIMP KZ» býkmekerlik keńsesiniń múlki tárkilengenin habarlaǵan bolatyn.
«Almaly aýdandyq soty 2021 jylǵy 16 aqpanda halyqaralyq izdeýge jariialanǵan «OLIMP KZ» býkmekerlik keńsesi» JShS basshylaryna qatysty úkim shyǵarylǵanǵa deiin múlikti tárkileý týraly Almaty qalasy prokýrorynyń ótinim-hatyn qanaǵattandyrdy. Olar býkmekerlik qyzmet jeleýimen zańsyz oiyn biznesin, aqsha qarajatyn shyǵarý jáne biýdjetke salyq tóleýden jaltarý boiynsha qylmystyq shemany uiymdastyrǵan», - dep habarlady vedomstvodan.
Sot aktisimen 3,6 mlrd teńge, 4 áýe kemesi jáne 3 avtokólik tárkilendi. Sotta uiymdasqan qylmystyq toptyń qatysýshylary bul múlikti qylmystyq jolmen alǵany dáleldendi.
