Densaýlyq saqtaý nysandaryn zamanaýi meditsinalyq jabdyqtarmen qamtamasyz etý problemasyn sheshý qajet. Bul týraly búgin Úkimettiń selektorlyq rejimdegi otyrysynda Premer-Ministr Baqytjan Saǵyntaev aitty, dep habarlaidy QazAqparat tilshisi.
«Eljan Amantaiuly, óńirlerden áriptesterdiń aitqan usynystaryn, ásirese, Qyrymbek Eleýulynyń aitqan usynystaryn qarap shyǵyńyz. Eger biz talaptardyń bárin óńirlerge jiberetin bolsaq, onda olarǵa da jumystaryn odan ary jandandyrý úshin qosymsha tetikter berýimiz qajet. Kórsetkishter boiynsha ákimder baiandap ótti. Máselen, ólim-jitimniń kóbeiýi qarttarǵa bailanysty dep solarǵa ysyra salyp otyrý, bylaisha aitqanda, durys emes. Biz ómir jasynyń uzaqtyǵyn 73 jastan asyramyz dep otyrmyz. Al endi qarttarymyz kóp, sol sebepten osyndai jaǵdai bolyp qaldy deimiz. Bul jumysqa degen kózqarastyń durys emestigin kórsetip otyrǵandai», - dedi Premer-Ministr elimizdiń Densaýlyq saqtaý ministri Birtanovqa qarata.
Úkimet basshysy skrining jasalǵan kezde kórsetkishter kóteriletindigin, biraq, sol skrining shyǵarý arqyly jumystardy jetildirý qajettigin basa aitty.
«Jańa aityp ótkendei, dárilerdiń tolyqqandy jetkizilýi, meditsinalyq quraldarmen, kadrlarmen tolyǵymen qamtamasyz etý jumystaryn Eljan Amantaiuly bir júiege keltirý qajet. Sol sebepten ákimderge búgingi aitylǵandardy eskere otyryp, jaǵdaidy retke keltirý boiynsha túbegeili sharalar qabyldaýdy tapsyramyn», - dedi Úkimet basshysy.
Sonymen qatar Baqytjan Saǵyntaev densaýlyq saqtaý nysandarynyń materialdyq-tehnikalyq jaǵdaiyn zamanaýi meditsinalyq jabdyqtarmen qamtamasyz etý problemasyn sheshý qajettigine nazar aýdardy.
«Bul jerde memlekettik-jekeshelik áriptestik syzbasyn tolyqqandy paidalaný kerek. Densaýlyq saqtaý ministrligi Bilim jáne ǵylym ministrligimen jáne ákimdiktermen birge arnaiy maman dárigerlerdi oqytý, emhanalar men aýrýhanalardy dáriger kadrlarmen qamtý, olardyń biliktiligin arttyrý, áleýmettik qoldaý sharalaryn qabyldasyn», - dedi ol.
