Foto: Parlam.kz
Búgin Májilis depýtaty Jarqynbek Amantaiuly Májilis kýlýarynda internet jelisindegi zańsyz áreketter týraly aityp, QR Úkimetine saýal joldady, dep habarlaidy Ult.kz.
Depýtat Jarqynbek Amantaiuly qazir internet bilim men aqparattyń kózi ǵana emes, jalǵan aqparat pen aldap-arbaýdyń, orynsyz bopsalap, adam ómirin tas-talqan etýdiń quraly bolyp otyrǵanyn aityp, qynjylys bildirdi.
«Blogerlikti bopsalaý men qyspaqtaýdyń quraly qylyp, bireýdiń abroiyn tógip, súringenin sýretteýdi batyrlyqqa balap júrgender barshylyq», - degen depýtat buǵan mysaldar keltirdi.
Ol óz sózinde taiaýda Atyraýda qaiǵyly jaǵdaimen aiaqtalǵan oqiǵany eske túsirdi.
«Qoǵamdyq tártipke baǵynýǵa shaqyrǵan kúzetshiniń ar-namysyn aiaýsyz taptaǵan blogersymaqtyń áreketinen soń azamattyń qan qysymy kóterilip, júregi toqtap qalǵan. Sóz - súiekten ótedi. Aqyry orynsyz daraqylyqtyń saldarynan bir áýlet qara jamyldy. Jalpy memlekettik qyzmette nemese el aldynda júrgen azamattardyń basqan qadamyn ańdyp, kóp aldynda masqaralap haip qýý ádetki dúniege ainaldy», - dedi Jarqynbek Amantaiuly.
Depýtat qoǵamdy dúrliktirgen taǵy bir mańyzdy másele – áleýmettik jelilerdegi arzan aqyl, sapasyz bilim satqysh, bilgishterdiń kóbeiýin atap ótti.
«Baiqap qarasaq, áleýmettik jelilerde «baqytqa jetý jolyn kórsetemin, jyldam baiýdy úiretemin, kúizelisten qutqaramyn, túpsanańdy túzetemin, bir aida juldyzǵa ainaldyramyn, tez aryqtatamyn, shet tilinde sairatyp jiberemin» degen sekildi san túrli kýrs, vebinar, trening satýshylar – bloger, biznes-trener, koých, psiholog, motivatorlardyń jarnamasy jeldei esip, saýdanyń kórigin qyzdyrýda. «Ańqaý elge aramza molda» demekshi olardyń arasynda elge tanymal shoý-biznes ókilderi, aityskerler de bar. Olardy aýyzeki tilde «infosyǵandar» dep ataidy. Olardyń júzdegen myń teńgege baǵalanǵan sabaqtaryn jurt tipti nesie rásimdep satyp alyp, keiin qaryzǵa belshesinen batyp qalǵany da jasyryn emes. Eldiń eńsemdi kótersem degen adal úmitin aram jolmen paidaǵa ainaldyrǵandardy qalai ataýǵa bolady. Bulardyń eshbir súzgi men qadaǵalaýdan tys ótkizip júrgen sabaqtarynyń kesirinen talai otbasynyń shańyraǵy ortasyna tústi», -dedi májilismen óz depýtattyq saýaldynda.
J. Amantaiulynyń aitýynsha, olardyń kópke usynyp otyrǵan sabaqtary bizdiń ulttyq qundylyqtarymyzǵa, Memlekettiń «Neke jáne Otbasy týraly» Zańyna qanshalyqty sai ekendigin tekserip, taldap jatqan eshkim de joq.
Depýtat usynǵan kebir derekterde elimizdegi osyndai info biznestiń jyldyq ainalymy 500 million AQSh dollaryn quraityny aitalǵan. Boljam boiynsha aldaǵy 5 jylda 2 millard dollarǵa jetýi múmkin deidi.
«Aitpaqshy, olar memleketke salyq tólei me ózi?!» - degen depýtat tipti infosyǵandardan mezi bolǵan jurtshylyq olarǵa tyiym salý maqsatynda 2023 jyldyń 23-shi qarashasynda petitsiia da jariialaǵan, alaida ol qaraýsyz qalǵan.
«Byltyr Májilis qabyrǵasynda «Onlain Platforma jáne onlain jarnama» týraly zań jobasy qabyldandy. Osy Zańnyń áli de bolsa oryndalýy osal bolyp jatqandyǵyn kórip otyrmyz. Áitpegende, biz kóterip otyrǵan máseleniń kóbi derlik atalǵan zańda búge-shigesine deiin qamtylǵan. Al, jurtshylyqtyń qarjylyq saýatyn arttyrýǵa baǵyttalǵan «Amanat» partiiasynyń «Qarysyz qoǵam» jobasynyń osyndai derttermen kúresýge baǵyttalǵan is sharalary bir tóbe», -dedi Jarqynbek Amantaiuly.
Sony eskere kele, Parlamenttiń tómengi palatasynyń depýtaty Úkimetke tórt talap qoidy:
Birinshi. Info biznes platformalarynyń mazmuny men ideologiiasyn jáne zańdylyǵyna, ony júrgizýshilerdiń derekterine monitoringti kúsheitip, zań buzýshylyqtarǵa jedel áreket etýi qajet.
Ekinshiden, «Onlain Platforma jáne onlain jarnama týraly» Zańǵa sáikes, jaýapkershilikke tartýda ýákiletti organdarǵa tiisti ýákilettik tolyq berilýi tiis.
Osy ýaqytqa deiin atalǵan zań aiasynda qansha adam jaýapkershilik júktegeni jaily statistikany ashyp kórsetý mańyzdy.
Úshinshiden, biznes-trenerler men koýchter úshin arnaiy, kásibi standarttar bekitilýi tiis.
Tórtinshiden, halyq arasynda internet alaiaqtardan, infosyǵandardan qorǵanýdyń amaldaryn túsindirý jumystaryn keńinen júrgizý qajet.
