Kóliktegi bas memlekettik sanitarlyq dáriger Sádýaqas Baiǵabylov halyqaralyq áýe reisterimen shetelden ushyp keletin otandastarymyzdy tekserý jumystaryna túsinistik tanytýdy surady, dep habarlaidy QazAqparat.
Aita ketsek taiaýda Nur-Sultan qalasynyń áýejaiynan eki jolaýshynyń qashyp ketkeni týraly BAQ-ta aqparat taraǵan edi.
«Qaýipsizdik sharalaryna qaramastan túsinistik tanyta bermeitin azamattar bar. Atap aitqanda taiaý kúnderi eki jolaýshy áýejaidan qashyp ketti. Olardyń jeke málimetteri bizge belgili bolǵandyqtan olardyń qaida ekenin anyqtaý qiyn bolmady. Osydan keiin olardy taýyp alyp, eki kúndik karantinge jatqyzdyq», - dedi Sádýaqas Baiǵabylov OKQ-da ótken baspasóz máslihatynda.
Ustalǵan azamattar karantindik statsionarda PTR test tapsyrǵan.
«Bizge keletin jolaýshylarǵa aitar keńesim: bul jolaýshylardan úlgi almańyzdar, sebebi árbir jolaýshy týraly jeke málimetterdiń bári bizde bolady. Aqparattyq júielerge engiziletin aqparattyq derekqor bar. Kez kelgen jolaýshyny tabý op-ońai», - dedi Sádýaqas Baiǵabylov.
Eske sala ketsek búgin QR Úkimetiniń baspasóz qyzmeti vedomstvoaralyq komissiianyń áýe kompaniialaryna PTR testi nátijesi týraly anyqtamasy joq jolaýshylardy ushaqqa otyrǵyzýǵa tyiym salý týraly sheshimin túsindirgen bolatyn. Bul talap tek sheteldik azamattarǵa qatysty. Shetelde júrgen QR azamattarynyń áýe reisterimen PTR testileýden ótkeni týraly anyqtamasynsyz otanyna oralýǵa quqyǵy bar. Mundai jaǵdaida Qazaqstanǵa kelgennen keiin qazaqstandyqtar PTR testileý nátijesin alǵanǵa deiin karantinge ornalastyrylatyn bolady. QR óńirleri arasyndaǵy ishki áýe reisteriniń ushaǵyna otyrǵyzý kezinde PTR test nátijesi týraly anyqtama talap etilmeidi.
