Belarýstik jýrnalist Roman Protasevichtiń ata-anasy Deutsche Welle basylymyna ulynyń tergeý izoliatorynda túsirgen videosyna qatysty pikir bildirdi, - dep habarlaidy Tengrinews.kz.
Natalia men Dmitrii Protasevich ulynyń ómirine alańdap otyr.
"Myna videoda biz Romannyń beti kógergenin anyq kórip otyrmyz, ony jaqsylap grimmen japqan. Murny synǵan siiaqty. Sol jaq beti isinip tur, onyń tisi syndy degen kúdik bar... Qylǵyndyrý izi bar...", - dedi Nexta Telegram-arnasynyń burynǵy bas redaktorynyń anasy.
"Álem, kómektesińizder. Sizderden ótinip suraimyn. Óitkeni olar ony óltiredi!", - dedi Natalia Protasevich.
Buǵan deiin buqaralyq aqparat quraldary Minsk tergeý izoliatorynda otyrǵan Roman Protasevichtiń úndeýin jariialaǵan bolatyn, onda jýrnalist tergeýmen birge jumys istep jatqanyn jáne Minskidegi tártipsizdikterdi uiymdastyrǵanyn moiyndaǵanyn málimdegen.
Eske salaiyq, 23 mamyrda kúndiz Ryanair áýe kompaniiasynyń Afinadan Vilniýske ushyp bara jatqan ushaǵy Minskide shuǵyl qonǵan. "Ushaq bomba qoiyldy degen habardan keiin qondyryldy", - delingen áýejai habarlamasynda. Keiin bomba týraly aqparat rastalmady.
Ushaq bortynda jýrnalist, Nexta telegram-arnasynyń burynǵy bas redaktory Roman Protasevich bolǵan. Nexta 2020 jylǵy tamyzda Belarýstegi prezidenttik sailaýdyń nátijeleri jariialanǵannan keiin jappai narazylyq kezinde oppozitsiianyń negizgi alańdarynyń biri boldy.
