Qazaqstandyq kásipqoi boksshy Sadriddin Ahmedov óz salmaǵyndaǵy áigili boksshylarmen kezdesý yqtimaldylyǵyna qatysty pikir bildirdi, dep habarlaidy QazAqparat tilshisi.
«Ár boksshynyń bir kýmiri bar. Biraq, boks jolynda meniń naqty kýmirim joq. Sebebi, Golovkin, Kanelo, Taison nemese Muhamed Áli sekildi áigili sportshylardyń árqaisysynyń bir jaqsy qabiletin alǵym keledi. Qaida júrsem de, «Sadriddin Qazaqstannan eken» dep aityp júrse, men úshin - ol úlken qýanysh. Kýmir retinde bireýdi qabyldamaimyn. Ár boksshydan bir qasietin, mysaly Kanelonyń qorǵanysyn, Golovkinniń qysym kórsetý qabiletin alyp, Maik Taisonnan da boiymyz alasa bolǵasyn bir qarymyn igersem deimin. Naqty bir boksshy maǵan unaidy, sol sekildi judyryqtasamyn dep aita almaimyn», - dedi Sadriddin Ahmedov OKQ-da ótken baspasóz máslihatynda.
Baspasóz máslihaty aiaqtalǵannan tilshiler boksshynyń jospary týraly surap kórdi.
««Eye of the Tiger Management» promoýterlik kompaniiasymen jumys istep jatqanymyzǵa 1 jyl bolady. Kelisimshart bes jylǵa sozylǵan. Qudai qalasa, úlken jekpe-jekterge meniń, promoýterimniń jáne bapkerimniń kelisýi boiynsha shyǵamyz. Sol sebepti, bári oida. Bári óz ýaqytymen iske asady», - deidi Sadriddin Ahmedov.
Boksshynyń aitýynsha, promoýterlik kompaniia ataqty boksshylarmen aiqas jaily usynys bildirmegen.
«Biz árqashan daiynbyz. Belgili bir kezeńnen ótý kerek. Bári óz ýaqytymen. Qai promoýtermen shyqsam da, qazaq eliniń atynan shyǵatynym anyq. 69,85 kelilik óz salmaǵymda dál qazir myqty sportshylar kóp. Olardyń qataryna Djarrett Hiord, Djermell Charlo, Lara sekildi myqty boksshylar bar. Qai-qaisysymen bolsa da, bir kúni shyǵatynym belgili. Ol kún de uzaq emes. Qudai qalasa, ol kúnge de jetemiz degen oidamyn», - dedi boksshy.
Eske sala ketsek, buǵan deiin 24 naýryz kúni «Almaty Arena» kesheninde kásipqoi boks keshi ótetinin jazǵan edik. Oǵan Qazaqstan, Resei, Afrika elderi, Venesýela, Ózbekstan, Belarýs, Grýziia jáne basqa da memleketterdiń boksshylary qatysatyny josparlanǵan.
Almatydaǵy boks keshinde Ahmedov pen 25 jastaǵy Indoneziia ókili Djon Rýba (17-5-1, 9KO) arasynda birinshi orta salmaqtaǵy WBC Asia titýly úshin aiqas ótedi. Jekpe-jek 10 raýndqa eseptelgen.
