Foto: Turar Qazanǵapov, Tengrinews.kz
Oqý-aǵartý ministrligi orta bilim berý uiymdarynda 2023–2024 oqý jylynyń bastalý merzimin, uzaqtyǵyn jáne kanikýl kezeńderin bekitti, dep habarlaidy "Ult aqparat" vedomstvonyń baspasóz qyzmetine silteme jasap.
"Orta bilim berý uiymdarynda 2023-2024 oqý jyly 1 qyrkúiekte bastaldy, 25 mamyrda aiaqtalady.
Birinshi toqsanda oqý ýaqyty 8 apta, kúzgi kanikýl 30 qazannan 5 qarashany qosa alǵanda 7 kúnge sozylady.
Ekinshi toqsanda 8 oqý aptasy, qysqy kanikýl 2023 jyldyń 29 jeltoqsanynda bastalady, 2024 jyldyń 7 qańtaryn qosa alǵanda kúntizbelik 10 kúnge jalǵasady.
Úshinshi toqsan 10 oqý aptasynan turady. 11 kúndik kóktemgi kanikýl 2024 jyldyń 21 naýryzynda bastalyp, 31 naýryzǵa (qosa alǵanda) deiin jalǵasady" - delingen habarlamada.
Vedomstvo málimetinshe, jyl saiyn birinshi synyp oqýshylary úshin úshinshi toqsanda qosymsha demalystar beriledi, uzaqtyǵy 7 kún – 2024 jyldyń 5 aqpanynan 11 aqpanǵa (qosa alǵanda) deiingi ýaqytty qamtidy.
"Tórtinshi toqsannyń uzaqtyǵy 8 oqý aptasyn quraidy. Sondai-aq 25 mamyrda qorytyndy shyǵarylyp, oqý jyly aiaqtalady" - delingen habarlamada.
