Elimizde qashyqtyqtan oqytý júiesin uiymdastyrýdy jobalaý keńsesi qurylýda. Bul jaiynda QR Bilim jáne ǵylym ministri Sholpan Karinova Facebook paraqshasynda jazdy, dep habarlaidy QazAqparat.
Onyń atap ótýinshe, Bilim jáne ǵylym ministrliginde, aimaqtyq bilim berý basqarmalarynda Qashyqtyqtan oqytý júiesin uiymdastyrý boiynsha jobalaý keńsesi qurylyp otyr. Bul rette indet kezeńinde oqý úrdisin uiymdastyrý boiynsha ýaqytsha sharalar engizgen kórshiles elderdiń tájiribesi, halyqaralyq tájiribe zerdelendi. Mektepter men ustazdar úshin tiisti usynymdar daiyndaldy. Ustazdar úshin arnaiy onlain, tele-kýrstar, vebinarlar ázirlendi.
«Buǵan qosa, ustazdar men balalarǵa «Balapan« jáne «El Arna« telearnalarynda tórtinshi toqsan bastalysymen kúnde 1-11 synyp oqýshylaryna aptasyna bes kún sabaq ótkiziledi. Qazir osy tele-sabaqtardyń arnaiy túsirilimi júrgizilýde. Ol sabaqtar memlekettik standart talaptaryna, oqý baǵdarlamalaryna sáikes qurylǵan. Oqýshylar úshin 2 myńnan astam tele-sabaq daiyndalady. Buǵan úlken kúsh jumsalýda», - dedi vitse-ministr.
Onyń atap ótýinshe, tele-sabaq barysynda Nur-Sultan qalasynyń, Nazarbaev Ziiatkelik mektepteriniń, respýblikalyq, halyqaralyq jáne jeke mektepterdiń úzdik ustazdary elimizdiń barlyq balalaryna sabaq beredi.
«Ustazdarǵa tek qoldaý qajet. Ustazdar men oqýshylarǵa bilim áleminde jańa asýlardy meńgerý jolynda tabys tileimiz», - dedi Sholpan Karinova.
