Bilim jáne ǵylym ministrligi mektep oqýshylaryna osyndai quqyq berip otyr, dep habarlaidy QazAqparat.
«Oqýlyq máselesine qatysty syndy búgin Memleket basshysy da aitty. Oqýlyqtarymyzdaǵy qatelikterdiń bolýy – tipti daýly taqyrypqa ainalyp ketti. Sondyqtan, bul rette amal-ádisti túpkilikti ózgertý kerek. Jalpy, biz tujyrymdamany ózgertkeli jatyrmyz. Keibir áriptesterimiz aitqandai, oqýlyq – qosalqy material degen pikirge óz basym úzildi-kesildi qarsymyn! Oqýlyq – kómekshi qural bop qalsa, negizgi qural ne bolmaq? Sol sebepti, oqýlyq – bizdiń oqýshylardy daiyndaýda negizgi qural bolyp qala beredi. Bul rette aýqymdy ári keshendi jumysty júrgizetinimizdi aitqym keledi», - dedi Bilim jáne ǵylym ministri Ashat Aimaǵambetov Tamyz konferentsiiasynda.
Ministr óz sózinde avtorlardyń, sarapshylardyń ózi oqytylatynyn atap ótti. Ashat Aimaǵambetovtyń aitýynsha, oqýlyqtarǵa qoiylatyn talaptar ázirlenip qoiǵan. Jýyq arada muǵalimder birlestikterimen ol talaptar talqylanbaq.
«Biyl ministrlik «Jeńil portfel» jobasyn júzege asyrady. Ol týraly aittyq. Biz ata-analarǵa tańdaý berdik. Oqýshy máselen, talap-tilegi bolsa qaǵaz oqýlyqtaryn synypqa, mektepte tastap ketip, úiinde elektrondy oqýlyqpen daiyndala alady. Eń bastysy, ministrlik oqýlyqtardyń elektrondy nusqalaryn paidalanýǵa quqyq beredi. Ary qarai ata-analary ózderi sheshedi. Sol sekildi jumys dápteri barlyq synyptarǵa mindetti bolmaýy tiis. Pedagogtar ata-analardy jumys dápterin satyp alýǵa mindettemeýi kerek», - dedi Ashat Aimaǵambetov.
