Respýblikalyq ǵylymi-praktikalyq bilim mazmunyn saraptaý ortalyǵynyń direktory Eldos Nurlanov BAQ ókilderine mektep oqýlyqtarynyń elektrondy nusqasyn qoldanysqa engizý múmkindikteri týraly málimet berdi, dep habarlaidy QazAqparat.
Eldos Nurlanovtyń aitýynsha, oqýlyqtardyń elektrondy nusqasy qoldanysqa enýi úshin ony ornalastyratyn platformalaraǵa aqyly jazylý máselesi sheshimin tabýy kerek. Ázirshe «Jazylý shyǵyny ata-analardyń qaltasynan alyna ma, álde jergilikti biýdjetten alyna ma» degen suraqtyń basy ashyq.
«Búgingi tańda mektep oqýlyqtarynyń elektrondy nusqasyn oqytý protsesine belsendi paidalaný máselesi arakidik talqylanyp júr. Qaǵaz oqýlyqtarmen qatar elektrondy oqýlyqtarǵa jazylýdyń reglamenti paida bolýy kerek. Sonda qaǵaz oqýlyqpen qatar elektrondy oqýlyqtardy jazylý arqyly paidalaný múmkindigi týyndaidy. Ázirge ol reglament bekitilgen joq. Biraq meniń oiymsha, onyń da tetikteri ábden oilastyrylyp, tiisti normativtik-quqyqtyq aktileri bekitilýi kerek», - dedi ortalyq direktory.
Eldos Nurlanov elektrondy nusqany kitap ornyna paidalaný tájiribesin engizý úshin áýeli saiasi sheshim qabyldanýy kerektigin aitty.
«Árine, balasy arqalap júrgen sómkeniń aýyrlyǵyn aityp, alańdaityn ata-analardyń bar eken ras. Bul másele áli talqylaný ústinde. Ol úshin elektrondy nusqany qaǵaz oqýlyqtarmen qatar qoldaný nemese kitapty aýystyrý týraly saiasi sheshim qabyldanýy kerek. Osyndai sheshim qabyldanatyn bolsa, jergilikti atqarýshy organdar qazirgidei qaǵaz oqýlyqtardy satyp alatyny siiaqty elektrondy oqýlyqtarǵa jazylý qunyn tólep, bilim berý platformalary arqyly paidalanýǵa bolady. Biraq bul áli jumys barysyndaǵy másele. Naqty sheshim shyqqan joq», - dedi Respýblikalyq ǵylymi-praktikalyq bilim mazmunyn saraptaý ortalyǵynyń direktory.
