Qoǵam qairatkeri, ǵalym, jazýshy Myrzatai Joldasbekov mektep oqýlyqtarynda qazaq aqyndarynan góri, orys dekabristeriniń tóńkerisshil uran sózderi basym bolǵanyna renishin bildirdi.
"Ústeldiń ústinde shóberemniń kitaby jatyr eken, "Rýskaia literatýra" deidi, 8-synypqa arnalǵan. Bul oqýlyqty qandai adam bekitkenin bilmeimin jáne "Mektep" baspasy shyǵarǵan. Ishi - tolǵan bylyq. Baiaǵy dekabrister, Ryleevtiń óleńi júr, Prizyvy k sverjeniiý vlasti... Biz sony oqytýymyz kerek pe? Máselen, myna balalardan surasam, Muqaǵalidi bilmeidi. Muqaǵali "meniń úsh baqytym bar" deidi. Birinshi baqytym - ol meniń ultym, ekinshi baqytym - tilim, úshinshi baqytym - Otanym! Óleńderin oqysańyzdar, tutas ulttyń qundylyqtaryn quryp otyr", - dep atap ótti ǵalym búgin "Nur Otan" partiiasy janyndaǵy "Miras" respýblikalyq keńesiniń otyrysynda.
Onyń aitýynsha, osy turǵyda Elbasynyń «Bolashaqqa baǵdar: rýhani jańǵyrý» atty maqalasy aiasynda ult múddesine sai keletin keleli máselelerdi atqarý mańyzdy.
"Men endi oilaimyn, Elbasymyz bizge osyndai tapsyrma berip otyr, mursat berip otyr, barlyǵymyz endi bar kúshimizdi salyp, osy rýhani jańǵyrý maqalasyndaǵy aitylǵan máselelerdiń barlyǵyn júzege asyrýymyz kerek. "Týǵan jer" baǵdarlamasy bárimizdiń kókeiimizde boldy. Bárińiz mektepte oqydyńyzdar, Sizge óz týǵan aýylyńyzdyń qasyndaǵy tóbeniń ózin oqytqan joq, qaidaǵy bir Bangladeshtegi, Afrikadaǵy ózendi, Jerdiń túbindegi adam bilmeitin Amerikadaǵy aýyldardy oqytty. Biz endi "Týǵan jer" baǵdarlamasy arqyly osyny qolǵa alýymyz kerek, óitpesek biz qandai patriot daiyndaimyz?! Ultqa janyn salatyn adamdardy daiyndaý úshin aldymen týǵan jerin súiýi kerek, ultyn súiýi kerek, óziniń týǵan halqynyń tarihyn bilýi kerek jáne onyń ádet-ǵurpyn, saltyn saqtaýy kerek dep oilaimyn", - dep túidi sózin M.Joldasbekov.
