Almatyda karantindik is-sharalardyń arqasynda, virýs juqtyrǵan balalardyń sany 2,5-3%-dan aspady, dep habarlaidy QazAqparat.
«Negizi balalardyń jas ereksheligine qaramastan nazarda ustaý qajet. Óitkeni, olar aýrýdy taratýda úlken ról atqarady. Patogenniń COVID-19 kontagiozy joǵary, sondyqtan virýs juqtyrǵan balalar ózderiniń jaǵdaiynyń aýyrlyǵyna jáne aýrýdyń klinikalyq kórinisine bailanysty úide oqshaýlanýy nemese aýrýhanaǵa jatýy tiis.Karantindik is-sharalardyń arqasynda búgingi kúnge deiin Almatyda virýs juqtyrǵan balalar sany 2,5-3%-dan aspady», – deidi Balalar qalalyq klinikalyq juqpaly aýrýlar aýrýhanasy bas dárigerdiń emdeý isi jónindegi orynbasary Jumagúl Eshibekova.
Onyń aitýynsha, áleýmettik ara qashyqtyq jáne gigienalyq sharalardyń saqtalmaýy, balalar arasynda infektsiia men aýrýdyń kúrt ósýine ákelip soǵýy múmkin. Sonymen qatar, maýsymdyq JRVI-diń órshýi yqtimal, bul COVID-19 virýsymen birge aýrýdyń aǵymyn qiyndatady.
Búgingi tańda balalar arasynda COVID-19 virýsyna qatysty 5 mańyzdy ereje belgili boldy:
1. Balalarda COVID-19 virýsynyń klinikalyq kórinisteri sirek kezdesedi;
2. Balalar eresektermen salystyrǵanda kóbinese simptomsyz tasymaldaýshy bolýy múmkin ( COVID-19 virýsy balalarda dene qyzýy, jótel, tynys alý qiyndyqtary siiaqty belgilersiz júredi);
3. Balalardyń kópshiliginde aýrý jeńil ótedi, biraq aýrýhanaǵa, sonyń ishinde reanimatsiia jáne qarqyndy terapiia bólimine jatqyzýdy qajet etetinderi de bar. Qaýip tobyna kiretinder - semizdik, qant diabeti, immýn tapshylyǵy, revmatikalyq aýrýlary bar, tynys alý joldarynyń sozylmaly aýrýlary, júrek-tamyr jáne basqa da aýrýlary bar balalar;
4. COVID-19 virýsynan keiin balalar «tsitokindik daýyl» júieli qabyný reaktsiiasyn damytýy múmkin, biraq, ol sirek kezdesedi.
5. Áleýmettik (fizikalyq) qashyqtyqty jáne gigienalyq sharalardy saqtaý balalar arasynda aýrýdyń taralýynnyń aldyn alýǵa múmkindik beredi;
«Áleýmettik ara qashyqtyqty jáne gigienalyq sharalardy saqtaý arqyly balalardy kúz jáne qys mezgilinde tynys alý joldarynyń infektsiialary, joǵarǵy jáne tómengi tynys alý joldarynyń sozylmaly aýrýlarynan qorǵap qalýǵa bolady. Sondyqtan qashyqtan oqytý formaty epidemiologiialyq turǵydan negizdelgen shara», – dep qortyndylady dáriger.
