Ulttyq konkishiler federatsiiasynyń vitse-prezidenti Oksana Ten qyzmetin bosatý týraly ústinen jazylǵan aryzǵa bailanysty baspasóz máslihatyn ótkizdi, dep habarlaidy QazAqparat.
Eń aldymen Ulttyq konkishiler federatsiiasynyń vitse-prezidenti baspasóz máslihatyn ótkizýdiń basty sebebin aitty.
«Meni osy baspasóz máslihatyn ótkizýge májbúr etkeni – kúni keshe Sergei Voronovtyń telefonyna bireýler qońyraý shalyp, onyń ómirine qaýip tónip turǵanyn, Qazaqstandy múlde umytsyn degeni boldy. Mánerlep syrǵanaýdaǵy osy máseleni eskere otyryp jáne oǵan tiisti organdar nazar aýdarýy múmkin dep baspasóz máslihatyn ótkizip otyrmyz», - dedi ol.
Jiyn barysynda Oksana Ten federatsiianyń «vitse-prezident» laýazymyna ózi eshqashan suralmaǵan, kerisinshe oǵan bul laýazymdy usynǵan.
«Menen sportta qalýǵa, mánerlep syrǵanaýdyń damytýǵa kómektesýge, uzaq jyldar boiy mánerlep syrǵanaýda jinaǵan tájiribemmen bólisýdi, mánerlep syrǵanaýdy damytý strategiiasyn ázirleýge kómektesýdi surady. Bul 2019 jyldyń kóktemi edi. Ol kezde federatsiia prezidenti Bolat Jámishev edi. Maǵan sol kisi osy laýazymdy usyndy. Men bul laýazymǵa barǵym kelgen joq. Biraq sporttyń damýyna úles qosaiyn dep oǵan kelisim berdim», - dedi Oksana Ten.
Al áleýmettik jelige jariialanǵan aryz hat boiynsha óz oiyn bylai jetkizdi.
«Eń aldymen maǵan biz qanshalyqty durys jolda júrmiz degen oi keldi. Sebebi, meniń federatsiiada júrgenime eki jyl ýaqyt ishinde kóptegen ózgerister bolǵan sekildi. Degenmen bul ózgerister oǵan múddeli jáne qyzyqty emes kóp jattyqtyrýshylarǵa áser etti. Men muny senimdi túrde aitamyn. Sebebi, bul ózgerister qarjydan bastap sport resýrsyna deiingi aralyqtyń bárin qamtydy», - dedi ol.
Eske salaiyq, mánerlep syrǵanaýdan Qazaqstan jatttyqtyrýshylary Oksana Tenniń qyzmetin bosatsyn degen aryz hat jazdy. Hattyń mátini áleýmettik jelide jariialandy.
Aita keteiik, Oksana Ten 2019 jyldan beri Ulttyq konkishiler federatsiiasynyń vitse-prezidenti. Ol - qazaqstandyq mánerlep syrǵanaýshy, 2014 jylǵy Qysqy Olimpiada oiyndarynyń qola júldegeri Denis Tenniń anasy. Denis Ten 2018 jyly Almatyda eki qylmyskerdiń qolynan qaza tapqan.
Al Sergei Voronov – Reseiden shaqyrylǵan, mánerlep syrǵanaýdan Qazaqstan quramasynyń jańadan taǵaiyndalǵan bas jattyqtyrýshysy.
