QR Indýstriia jáne infraqurylymdyq damý vitse-ministri Talǵat Janjúmenov Qazaqstanda jasalatyn ókpeni jasandy jeldetý apparatynyń baǵasy týraly suraqqa jaýap berdi, dep habarlaidy QazAqparat.
«Bir ÓJJ apparaty kompressor, ylǵaldaýysh jáne ózge de qajetti quraldarymen birge jáne tasymaldaý shyǵyndaryn qosqanda 8,9 mln teńgege ainalady. ÓJJ apparattarynyń tolyq emestigi týraly senator syny rastalsa, búgin otstavkaǵa ketýge ázirmin», - dedi Talǵat Janjúmenov ministrlikte ótken brifingte.
Sonymen birge, vitse-ministr «Qazaqstandyq ÓJJ apparattary elektr qýatynsyz jumys istei ala ma?» degen suraqqa jaýap berdi.
«Jaryq sónip qalsa da, barlyq aýrýhana rezervtik qýat kózimen jabdyqtalǵan. Munda generator emes, kompressor týraly aityp otyrmyz. Elektr energiiasy emes, statsionarlyq ottegi jetkizý jóninde. Ókinishke qarai, statsionarlyq ottegi berý júiesi elimizdiń barlyq aýrýhanasynda joq. Sol úshin de bul qurylǵylar qosymsha kompressormen jabdyqtalǵan, olar ottegin tolyqtyryp turady. Iaǵni, ortalyq ottegimen jabdyqtaý júiesi bolmasa da, olar ózdiginen jumys istei alady. Aýyr ottegi ballondaryn tasý qajet emes», - dedi T. Janjúmenov.
Buǵan deiin senator Nurlan Qylyshbaev respýblikalyq biýdjet qarajatyn jumsaýdy, ásirese memlekettiń áleýmettik mindetterdi oryndaýyna jáne COVID-19-ǵa qarsy kúres jónindegi sharalarǵa bailanysty tásilderdi qaita qaraýǵa shaqyrdy.
«Indýstriia jáne infraqurylymdyq damý ministrligi Úkimet rezerviniń qarajaty esebinen otandyq óndirýshiden 1500 dana ÓJJ apparatyn satyp alǵan, 17 óńirdiń densaýlyq saqtaý uiymdary is júzinde tek 831-in ǵana qabyldady. Qalǵan 669 ÓJJ apparaty tolyqtyrylmaǵany úshin qabyldanbaǵan», - dep málimdedi depýtat.
