Ońtústik Qazaqstan oblystyq Qazaqstan halqy Assambleiasynyń uiymdastyrýymen Sairam aýdany Mankent aýylynda túrli sala mamandary men jastardyń kezdesýi ótti. Basqosýda Memleket basshysynyń «Bolashaqqa baǵdar: rýhani jańǵyrý» maqalasynda aitylǵan mindetterdiń máni, eldiń birligi men tatýlyǵyn saqtaý jáne nyǵaitý jaiy sóz boldy, dep habarlaidy Ult.kz tilshisi QazAqparat agenttigine silteme jasap.
Alqaly jiynǵa oblystyq assambleia hatshylyǵy men din máselelerin zertteý ortalyǵynyń qyzmetkerleri, etnomádeni birlestikterdiń tóraǵalary men aýdandyq jumyspen qamtý jáne áleýmettik baǵdarlamalar, ishki saiasat, ishki ister bólimderiniń mamandary qatysty. Keleli keńeste sóz alǵan aýdan ákimi Baqtiiar Mamaev Elbasynyń baǵdarlamalyq maqalasynda aitylǵan qoǵamdyq sana, básekege qabilettilik, ulttyq kod, pragmatizmniń mán-mańyzyna keńinen toqtaldy. Al, jiynda sóz alǵan oblystyq Qazaqstan halqy Assambleiasy tóraǵasynyń orynbasary Muratáli Qalmuratov eldegi turaqtylyq pen kelisimdi saqtaýdyń mańyzyn sóz etti.
«Kez kelgen qoǵamda birlik pen yntymaq basty orynda turady. Yntymaǵy jarasqan eldiń bolashaǵy jarqyn. Muny memleketimizdiń bolashaq taǵdyryna jaýapty sanalatyn jastar jaqsy túsinýi tiis. Sondyqtan, túrli etnos jastary arasynda dostyqty nyǵaitý, olardyń boiynda eljandylyq qasietti qalyptastyrý assambleia jumysynyń basty baǵytyna ainalyp otyr. Qazaqstan - etnosaralyq kelisim salasynda óz tájiribesin, biregeilik pen birtektiliktiń qaitalanbas modelin qalyptastyrdy. Ony saqtap, qoǵamdy damytýda jastarǵa artylar jaýapkershilik júgi aýyr»,- dedi Muratáli Orazalyuly.
Erkin formatta ótkizilgen jiynda aýyl jastary usynys-pikirlerin ortaǵa salyp, ózderin qyzyqtyrǵan túrli suraqtarǵa sala mamandarynan tushymdy jaýap aldy.
