Ońtústik Qazaqstan oblysynda halyqty óz erkimen jumys kúshi jetispeitin soltústik óńirlerge kóshirý jumystary jandanyp keledi, dep habarlaidy "Ult aqparat" oblys ákiminiń baspasóz qyzmetine silteme jasap.
Úgit-nasihat júrgizý maqsatynda óńirge Pavlodar oblysynan bir top delegatsiia keldi. Top quramynda Dúniejúzi qazaqtary qaýymdastyǵynyń Pavlodar oblystyq filialynyń basshysy Zaýyt Bolat, Aqsý qalasy, Qalqaman aýyldyq okrýginiń ákimi Orda Ermekbaev, Ekibastuz qalasy, Solnechnyi aýyldyq okrýginiń ákimi Marjan Alshymbaeva, Aqsý qalasy, Qyzyljar aýyldyq okrýginiń ákimi Jeńis Ábiken, Mai aýdany, Malaisary aýyldyq okrýginiń ákimi Janar Komasheva, Ekibastuz qalasy ákimdiginiń aýylsharýashylyǵy bóliminiń bas mamany Aigerim Shákirbekovalar bar.
Úgit-nasihat júrgizýdi maqsat tutqan top aldymen Tóle bi aýdanyna atbasyn burdy. Aýdannyń aýyl-aimaǵyn aralap, halyqpen júzdesken delagatsiia soltústikke kóshýge nietti azamattarǵa memleket tarapynan usynylatyn basymdyqtar men jeńildikterdi baiandap berdi. Jiynǵa qatysýshylarǵa Pavlodar oblysyndaǵy jumys kúshin talap etip otyrǵan eldi-mekender týraly qysqasha beinerolik kórsetildi. Bos jumys oryndardyń denin memlekettik qyzmet, bilim salasy, densaýlyq saqtaý, aýylsharýashylyǵy salalaryndaǵy mamandyqtar quraidy.
«Bizde sońǵy jyldary maman tapshylyǵy qatty sezilip otyr. Ásirese, memlekettik qyzmet túrlerine mamandar jetispeidi. Bul rette balabaqsha, mektep muǵalimderi, densaýlyq saqtaý salasynda eńbek etem deýshilerge esigimiz aiqara ashyq. Eń bastysy - soltústikke kóshýge nietti mamandardyń óz ynta -jigeri, qyzyǵýshylyǵy bolsa, qabyldaýǵa daiarmyz», dedi Aqsý qalasy, Qalqaman aýyldyq okrýginiń ákimi Orda Ermekbaev.
Jalpy, Pavlodar oblysy egis egýmen, mal sharýashylyǵymen ainalysýǵa da óte qolaily. Ol jaqtaǵy aýyldy jerlerde baspana baǵasy da asa qymbat emes. Osy jaittarǵa toqtalǵan top músheleri tólebilikterdi Pavlodar oblysyna qonys aýdaryp, jumysqa ornalasyp, jeke kásipkerlikpen ainalysýǵa shaqyrdy.
Pavlodar oblysynyń kelgen taǵy bir top Túlkibas aýdanynyń turǵyndarymen kezdesti. Aýdan ákimshiliginiń kishi májilis zalynda ótken jiynǵa bas-aiaǵy 42 adam qatysyp, atalǵan oblystaǵy bos jumys oryndarynyń jai-kúiinen habardar boldy. Jinalǵandardyń ishinen 4 otbasy Pavlodar oblysyna qonys aýdarýǵa nietti ekendikterin jetkizdi.
Aita keteiik, 2017 jyldyń 10 aiynda Túlkibas aýdanynan Pavlodar oblysynyń Ertis aýdanyna 3 otbasy, Soltústik Qazaqstan oblysynyń Aqqaiyń aýdanyna 1 otbasy óz erkimen qonys aýdarǵan. Qonys aýdarǵan otbasylardyń músheleri turaqty jumysqa ornalasyp, balalary mektep-balabaqshalarǵa ornalastyrylǵan.
