Búgin Ońtústik Qazaqstan oblysynyń ákimi Janseiit Túimebaev Qurban ait merekesine orai, Shymkent qalasynda ornalasqan Ardagerler úiine baryp, ondaǵy demalýshy qariialardy merekemen quttyqtady. Musylman jurtynyń qasietti merekesi sanalatyn osynaý ulyq meiramda 200-ge jýyq qazynaly qartqa aittyq dastarhan jaiyp, syi-siiapat jasady, dep habarlaidy ákimniń baspasóz qyzmeti.
«Búgingi dastarhan basynda «Soǵys ardagerleri», «Eńbek ardagerleri», «Batyr analar» syndy airyqsha qurmetke ie aldyńǵy býyn aǵa-apalar otyr. Sizder, búkil ǵumyrlaryńyzdy elimizdiń ósip, órkendeýine – bolashaq jastarymyzdyń jaqsy jaǵdaida jetilýine baǵyshtadyńyzdar. Sondyqtan, osyndai emdeý-saýyqtyrý ortalyǵyna kelip, em-dom alyp turýǵa ábden laiyqtysyzdar. Munda emdelýshi eki adamǵa bir qyzmetkerden bólingen. Odan bólek, ardagerlerimiz úshin túrli emdik protsedýralardy usynǵan kabinetter jetkilikti. Elbasynyń elimizdiń áleýmettik salalary – densaýlyq saqtaý men bilim berý salalaryna airyqsha kóńil bólip otyrǵanyn bilesizder. Demek, memleketimizdiń osyndai qamqorlyǵy odan ármen de jalǵasyn taba beretinine senimim kámil», - dedi oblys basshysy.
OQO jumyspen qamtýdy úilestirý jáne áleýmettik baǵdarlamalar basqarmasyna baǵynysty «Ardagerler úii» kommýnaldyq memlekettik mekemesinde búginde 175 ardager – tyl eńbekkerleri men zeinetkerler, batyr analar men múgedekter, sondai-aq, aýǵan soǵysynyń ardagerleri emdik-saýyqtyrý sharalarynan ótýde.
Árbir on bes kúnde 200 ardagerdi qabyldaityn emdeý-saýyqtyrý ortalyǵynda jylyna 4 myń UOS ardagerleri men solarǵa teńestirilgender, «Halyq qaharmany» ataǵyn ielengender, III dárejeli Eńbek dańqy ordenimen marapattalǵandar, «Altyn alqa», «Kúmis alqamen» nagradtalǵandar jáne jasyna, múgedektigine bailanysty zeinetkerler emdeledi.
