Ońtústik Qazaqstan oblysynyń Shymkent, Túrkistan men Kentaý qalalarynyń turǵyndaryna 18 million teńgege deiin nesie alýǵa múmkindik bar, dep habarlaidy "Ult aqparat" oblys ákiminiń baspasóz qyzmetine silteme jasap.
Merzimi 7 jylǵa deiin beriletin nesieniń jyldyq mólsherlemesi 6 paiyzdy quraidy. Bul qarjy nátijeli jumyspen qamtý jáne jappai kásipkerlikti damytýdyń 2017-2021 jyldarǵa arnalǵan baǵdarlamasynyń ekinshi baǵyty aiasynda usynylyp otyr.
Baǵdarlama jumyssyzdarǵa, ózin-ózi qamtyǵan azamattarǵa, aýyl sharýashylyǵy kooperativteri men olardyń múshelerine, sondai-aq, bastaýysh jáne jumys istep turǵan kásipkerlerge arnalǵan. Memlekettik baǵdarlamany júzege asyrý úshin 2,6 mlrd teńge bólingen. Bul týraly Túrkistan jáne Kentaý qalalarynda ótken kóshpeli seminarda Ońtústik Qazaqstan oblysy ákiminiń orynbasary Baýyrjan Jamalov málimdedi. Onyń aitýynsha, baǵdarlamanyń maqsaty - shaǵyn biznesti damytý úshin halyqqa qarjy kózin usyný.
«Nátijeli jumyspen qamtý jáne jappai kásipkerlikti damytýdyń 2017-2021 jyldarǵa arnalǵan baǵdarlamasyna óńirimizdegi 3 qala - Shymkent, Túrkistan jáne Kentaý turǵyndary qatysa alady. Baǵdarlamanyń ekinshi baǵytyn júzege asyrý úshin 2,6 mlrd teńge bólingen. Búgingi tańda osy baǵdarlama boiynsha 6 qarjy institýty jumys jasaýda - Qazaqstannyń halyq banki, Nurbank, ATF Banki, Evraziialyq bank, Forte Bank jáne «Yrys» MQU», - dedi oblys ákiminiń orynbasary Baýyrjan Jamalov.
Bul tusta eger kepildikke qoiylatyn múlik jetkiliksiz bolsa, onda bastaýysh kásipkerlerge kepildendirilgen kepildi qoldanýǵa múmkindik bar.
«Ár nesie rásimdeý úshin kepildik kerek. Eger kepildik jetispese, onda «Damý» kásipkerlikti damytý qory arqyly kepildendirilgen kepildi qoldanýǵa bolady. Bul baǵdarlamanyń basqalarynan ereksheligi - jeńildetilgen nesie berýde. Buǵan qosa nesie buryn az mólsherde berilse, qazir 18 million teńgege deiin qarastyrylǵan. Jáne buǵan deiin kepil múlkine qatysty qiyndyqtar týyndasa, qazir kepildendirý qarastyrylyp otyr», - dep atap ótti OQO kásipkerlik, indýstrialdy-innovatsiialyq damý jáne týrizm basqarmasy basshysynyń orynbasary Baǵlan Jumashbekov.
Aita keteiik, nátijeli jumyspen qamtý jáne jappai kásipkerlikti damytý baǵdarlamasy Qazaqstanda jyl basynan beri júzege asyrylýda. Bankterge qarjy - qyrkúiek aiynda, al shaǵyn qarjy uiymyna ótken aptada bólindi. Qazir eń bastysy - shaǵyn biznesti damytýǵa bólingen memlekettik qarjyǵa qol jetkizýdi ońailatý.
