Ońtústik Qazaqstan memlekettik pedagogikalyq ýniversiteti biyl 80 jyldyq mereitoiyn atap ótti. Atalǵan oqý ordasynyń mereili merekelik sharasyna QR Bilim jáne ǵylym ministri Erlan Saǵadiev pen oblys ákimi Janseiit Túimebaev, QR Parlamenti Senatynyń jáne Májilisiniń depýtattary men QR Ulttyq ǵylym Akademiiasynyń akademikteri, oblystyq maslihat depýtattary jáne joǵary oqý oryndarynyń retkorlary men prorektorlary qatysty, dep habarlaidy Ult.kz tilshisi.
Joǵarǵy oqý ornyn seksen jyldyq meroitoiymen quttyqtaǵan aimaq basshysy ýniversitet uzaq jylǵy dańqty tarihynda úlken bedelge ie bolǵanyn atap ótti.
«Sapaly professorlyq-oqytýshylyq quramymen otandyq ǵylym men bilimniń kóshbasshysy atanǵan bul bilim ordasy - 60 myńǵa jýyq pedagogtar men kóptegen memlekettik jáne qoǵamdyq qairatkerlerge altyn uia boldy. Shymkent muǵalimder institýty bolyp ashylǵan 1937 jyldan bastap ulttyń ziialy, mádeni jáne rýhani áleýetin qurýdyń negizi bola bilgen ýniversitet kúni búginge deiin qabiletti, básekelese alatyn alǵyr jańashyl mamandardy daiyndap keledi. HH ǵasyrdyń alǵashqy jyldarynda qoǵamdyq qajettilikten dúniege kelgen eki jyldyq muǵalimder institýty óz tarihynda damý men órkendeýge qol jetkizdi», - dedi Janseiit Túimebaev.
Budan bólek, saltanatty jiynda jas urpaqty oqytý jáne tárbieleý isindegi eleýli tabystary úshin «Ybyrai Altynsarin» tósbelgisimen, ǵylym jáne bilim berý salasyndaǵy erekshe eńbegi úshin «Qazaqstan Respýblikasynyń ǵylymyn damytýǵa sińirgen eńbegi úshin», «Qazaqstan Respýblikasynyń bilim berý isiniń qurmetti qyzmetkeri» tósbelgilerimen jáne Ońtústik Qazaqstan oblysyna sińirgen eńbegi úshin medalimen, oblys ákiminiń gramotasymen jalpy sany otyz azamat marapattaldy.
Aita keteiik, atalmysh oqý orny 1937 jyly Shymkent pedagogika institýty bolyp, 2011 jyly Elbasynyń tikelei aralasýymen Ońtústik Qazaqstan memlekettik pedagogikalyq institýty bolyp qaita ashyldy. Aǵymdaǵy jyldyń 17 qarashasynda Úkimet qaýlysymen institýt - ýniversitet mártebesine ie boldy.
