Maqtaral aýdanynda qazirgi tańda jemis-jidek pisip jetilip, diqandar ónim jinaý kezeńin bastap ketti. Olar jalpy kólemi 1005 gektar jerge egilgen jemis-jidek pen júzimnen búginniń ózinde 2766 tonna ónim jinady. Diqandar otandyq naryqty qamtamasyz etýmen qatar jemis-jidekterdi shetelderge eksporttaýda. Bul týraly OQO ákiminiń baspasóz qyzmeti habarlady.
Osyndai iri jemis-jidek óndirýshilerdiń biri «Arsenal sad» óndiristik kooperativi. Jer aýmaǵy 350 gektardy quraityn baqta jemisterdiń barlyq túri ósiriledi. Máselen, baqtyń 110 gektaryna júzim, 100 gektaryna alma, 22 gektaryna shabdaly, 25 gektaryna qara órik, 10 gektaryna shie egilgen.
Kúni keshe 60 tonna júzimdi Reseige jibergen kooperativ qazirgi ýaqytta shabdaly jinaý naýqanyn bastap jibergen. Shabdaly óniminiń basym bóligi Resei Federatsiiasyna jiberiletin bolsa, qalǵany ishki naryqta saýdalanatyn bolady.
Júzimniń ónimdiligi gektaryna 22 tonna ekenin aitqan sharýa buryn júzimniń blekmeidjik, viktoriia sorttary týraly qazaqstandyq kásipkerler bilmeitin, satyp alýǵa seskenetin edi,- deidi. Al, biyl dál osy sorttarǵa degen qyzyǵýshylyq artypty. Óitkeni baǵasy qoljetimdi, dámi til úiiredi. Eýropadan keletin ónimderge qaraǵanda áldeqaida arzan eken.
Munda turaqty 150 adam jumyspen qamtylsa, naýqan kezinde 500-ge tarta jumysshylar jumysqa tartylady. Ónimderdi jinap, saraptap, sorttap, eksporttyq jáshikterge jaiǵastyrǵanǵa deiingi jumysty túgeldei terimshiler atqarady. Árbir ónim uzaq jolda jaramsyzdanbaýy úshin olardyń jáshikterde durys ornalasýy erekshe mańyzǵa ie.
«Arsenal sad» óndiristik kooperativiniń baý-baqshasynda jas kóshetter daiyndalatyn arnaiy tálimbaqta bar. Munda almanyń, almurttyń, alshanyń, qara óriktiń birneshe sorttary men dekarativti aǵashtardyń kóshetteri ósirilýde. Kóshetterge suranys óte joǵary. Endi qazaqstandyq diqandar kóshet alyp kelý úshin shetel aspaityn bolady.
