ماقتارال اۋدانىندا قازٸرگٸ تاڭدا جەمٸس-جيدەك پٸسٸپ جەتٸلٸپ, ديقاندار ٶنٸم جيناۋ كەزەڭٸن باستاپ كەتتٸ. ولار جالپى كٶلەمٸ 1005 گەكتار جەرگە ەگٸلگەن جەمٸس-جيدەك پەن جٷزٸمنەن بٷگٸننٸڭ ٶزٸندە 2766 توننا ٶنٸم جينادى. ديقاندار وتاندىق نارىقتى قامتاماسىز ەتۋمەن قاتار جەمٸس-جيدەكتەردٸ شەتەلدەرگە ەكسپورتتاۋدا. بۇل تۋرالى وقو ەكٸمٸنٸڭ باسپاسٶز قىزمەتٸ حابارلادى.
وسىنداي ٸرٸ جەمٸس-جيدەك ٶندٸرۋشٸلەردٸڭ بٸرٸ «ارسەنال ساد» ٶندٸرٸستٸك كووپەراتيۆٸ. جەر اۋماعى 350 گەكتاردى قۇرايتىن باقتا جەمٸستەردٸڭ بارلىق تٷرٸ ٶسٸرٸلەدٸ. مەسەلەن, باقتىڭ 110 گەكتارىنا جٷزٸم, 100 گەكتارىنا الما, 22 گەكتارىنا شابدالى, 25 گەكتارىنا قارا ٶرٸك, 10 گەكتارىنا شيە ەگٸلگەن.
كٷنٸ كەشە 60 توننا جٷزٸمدٸ رەسەيگە جٸبەرگەن كووپەراتيۆ قازٸرگٸ ۋاقىتتا شابدالى جيناۋ ناۋقانىن باستاپ جٸبەرگەن. شابدالى ٶنٸمٸنٸڭ باسىم بٶلٸگٸ رەسەي فەدەراتسيياسىنا جٸبەرٸلەتٸن بولسا, قالعانى ٸشكٸ نارىقتا ساۋدالاناتىن بولادى.
جٷزٸمنٸڭ ٶنٸمدٸلٸگٸ گەكتارىنا 22 توننا ەكەنٸن ايتقان شارۋا بۇرىن جٷزٸمنٸڭ بلەكمەيدجيك, ۆيكتورييا سورتتارى تۋرالى قازاقستاندىق كەسٸپكەرلەر بٸلمەيتٸن, ساتىپ الۋعا سەسكەنەتٸن ەدٸ,- دەيدٸ. ال, بيىل دەل وسى سورتتارعا دەگەن قىزىعۋشىلىق ارتىپتى. ٶيتكەنٸ باعاسى قولجەتٸمدٸ, دەمٸ تٸل ٷيٸرەدٸ. ەۋروپادان كەلەتٸن ٶنٸمدەرگە قاراعاندا ەلدەقايدا ارزان ەكەن.
مۇندا تۇراقتى 150 ادام جۇمىسپەن قامتىلسا, ناۋقان كەزٸندە 500-گە تارتا جۇمىسشىلار جۇمىسقا تارتىلادى. ٶنٸمدەردٸ جيناپ, ساراپتاپ, سورتتاپ, ەكسپورتتىق جەشٸكتەرگە جايعاستىرعانعا دەيٸنگٸ جۇمىستى تٷگەلدەي تەرٸمشٸلەر اتقارادى. ەربٸر ٶنٸم ۇزاق جولدا جارامسىزدانباۋى ٷشٸن ولاردىڭ جەشٸكتەردە دۇرىس ورنالاسۋى ەرەكشە ماڭىزعا يە.
«ارسەنال ساد» ٶندٸرٸستٸك كووپەراتيۆٸنٸڭ باۋ-باقشاسىندا جاس كٶشەتتەر دايىندالاتىن ارنايى تەلٸمباقتا بار. مۇندا المانىڭ, المۇرتتىڭ, الشانىڭ, قارا ٶرٸكتٸڭ بٸرنەشە سورتتارى مەن دەكاراتيۆتٸ اعاشتاردىڭ كٶشەتتەرٸ ٶسٸرٸلۋدە. كٶشەتتەرگە سۇرانىس ٶتە جوعارى. ەندٸ قازاقستاندىق ديقاندار كٶشەت الىپ كەلۋ ٷشٸن شەتەل اسپايتىن بولادى.
