Ońtústik Qazaqstan oblysyndaǵy Abai aýylynda joǵary synyp oqýshylary zorlady degen 7 jasar bala anasymen birge Astanadan Almatyǵa ushady. Anasy men uly "Analar úii" ortalyqtarynyń birine ornalastyrylmaq, - dep habarlaidy sputniknews.kz aqparattyq agenttigi.
"Analar úii" atqarýshy komitetiniń tóraiymy Anar Rahymbaevanyń aitýynsha, taiaý arada halyqaralyq mamandardy tartý arqyly saraptama júrgizý josparlanyp otyr. Saraptama búldirshinniń zorlanǵan-zorlanbaǵanyn anyqtaidy.
"Barlyq áreket bas prokýratýra ókilderiniń qatań qadaǵalaýynda bolady. Tergeý múddesine bailanysty istiń anyq-qanyǵyn jariia ete almaimyn. Atalǵan jaǵdaidy quqyqtyq alańda sheshý qajet, jan-jaqtan óte kóp aqparat tarap jatyr, barlyǵynan tynyshtalyp, jaǵdaidy ýshyqtyrmaýdy suraimyn", — degen Rahymbaeva balanyń ájesi men tátesi de Almatyǵa jol júretinin naqtylady.
Rahymbaeva daǵdarys ortalyǵynyń qaýipsizdik qyzmetiniń jumysy kúsheitilgenin atap ótti.
Al balanyń qorǵaýshysy Qurmanǵazy Músir Almatyǵa ushar aldynda dúisenbi, 19 naýryz kúni qylmystyq is aiasynda bas prokýratýra ókilderimen kezdesý ótetinin aitty.
OQO-nyń Saryaǵash aýdanyndaǵy Abai aýylynda bolǵan oqiǵa jurttyń jaǵasyn ustatty. 7 jasar balanyń ájesi ótken jyldyń tamyzynan beri nemeresin joǵary synyp oqýshylary zorlap kelgenin málimdegen edi. Egde áiel politsiiaǵa shaǵymdanǵanmen, ondaǵylar isti toqtatyp tastaǵan.
