Ońtústik Qazaqstan oblysynda jyl sońyna deiin 20 medpýnkt paidalanýǵa beriledi. Bul týraly óńirlik kommýnikatsiialar qyzmetinde ótken baspasóz máslihatynda Densaýlyq saqtaý basqarmasynyń basshysy Muqan Egizbaev jariia etti.
Jyl basynan beri atqarylǵan jumystardy baiandaǵan spikerdiń aitýynsha, óńirde budan ózge 4 iri emhananyń qurylys júrgizilip jatyr.
«Biyl jergilikti biýdjet qarajaty esebinen 3,7 mlrd. teńgege 34 nysan salynyp, 1,92 mlrd. teńgege 10 nysanda kúrdeli jóndeý jumystary júrip jatyr. Oblys tarihynda birinshi ret bir kezende Sairam, Maqtaaral aýdandary men Kentaý qalasynda 4 iri emhananyń qurylysy qatar júrgizilýde», - dedi oblystyń bas dárigeri.
Memlekettik-jekeshelik áriptestik sheńberinde densaýlyq saqtaý infraqurylymyn odan ári damytýdy qamtamasyz etý úshin Shymkent qalasynda «Qaitpas» shaǵynaýdanynda bir aýysymda 500 adam qabyldaityn emhana salynýda. Budan basqa oblys ortalyǵynda taǵy qalalyq 3 emhana salynady. Al OQO ákimdigi jańa onkologiialyq dispanserin salýǵa jer telimin bóldi. Týberkýlezge qarsy dispanserin qala shetine shyǵarý máselesi sheshildi. Saryaǵash jáne Shymkent qalalarynda perinataldy ortalyqtar salýǵa jer telimderi bólindi.
«Óńirde modýldik quramaly meditsinalyq pýnkt satyp alý jobasy iske qosyldy. Munyń ereksheligi bir pýnkttiń quny jergilikti biýdjet úshin qurylys salýǵa qaraǵanda eki ese arzanǵa túsedi. Buryn mundai qurylys júrgizýge 2 jyldai ýaqyt ketetin. Al modýldik medpýnkti tolyq iske qosýǵa nebári 2-aq ai ýaqyt ketedi. Oblys ákimdiginiń qoldaýymen biyl osyndai 20 pýnkt ornatylady. 2018 jyly 67-si paidalanýǵa beriledi. Osylaisha oblystyń meditsinalyq pýnktterge degen qajettiligin qysqa merzimde 100% óteitin bolamyz», - dedi M.Egizbaev.
Jedel meditsinalyq kómek qyzmetin halyqaralyq standarttarǵa sáikestendirý jáne jańǵyrtý maqsatynda Shymkent qalalyq jedel meditsinalyq járdem kórsetý stantsiiasy senimgerlik basqarýǵa sheteldik kompaniiaǵa berildi. Oǵan qosymsha 6 beket ashyldy.
