Búgin Ońtústik Qazaqstan oblysynyń ákimi Janseiit Túimebaev Shymkent qalasy «Sáýle» shaǵyn aýdanyndaǵy jańadan paidalanýǵa berilgen №129 jalpy orta mektebiniń «Alǵashqy qońyraý» saltanatty sharasyna qatysyp, Bilim kúnimen barsha ustazdar men shákirtterdi quttyqtady, dep habarlaidy "Ult aqparat" ákimniń baspasóz qyzmetine silteme jasap.
«Bul kún – jańa oqý jylyna, jańa jetistikter men tabystarǵa bastaý beretin kún. Bilim berý isi – bul tamyry tereńde jatqan, ult pen dinge bólinbeitin, bir kún nemese bir jylda kórinbeitin ǵalamat qundylyq. Al, osy bir uly qundylyqty boiǵa sińiretin tulǵa – muǵalim. Iaǵni sizdersizder, qurmetti ustazdar! Elbasymyz óziniń «Bolashaqqa baǵdar: rýhani jańǵyrý» atty strategiialyq maqalasynda bilim men ǵylymdy jetildirý, jas urpaq tárbiesi máselelerine basa kóńil bólgeni barshańyzǵa belgili. Sondyqtan da Sizderge, júkteler mindettiń salmaǵy da basym», - dedi ákim.
Toǵyz myń turǵyny bar «Sáýle» shaǵyn aýdanynda boi kótergen jańa mektep 1200 balaǵa shaqtalǵan. Úsh aýysymda bilim berilip kelgen mektepte búginde oqýshy sany 1350-di quraidy. Zaman talabyna sai jabdyqtalyp, balalardyń tolyqqandy bilim alýyna, salaýatty ómir saltyn qalyptastyrýyna jaǵdai jasaityn tiptik oqý orny 3 qabattan turady. «Nurly Jol» baǵdarlamasy boiynsha salynǵan mektepte himiia, fizika, biologiia laboratoriialary, mýltimediialyq-lingofondyq kabinetter men kompiýter synyby, kitaphana, májilis jáne oqý zaly bar.
Munan soń, óńir basshysy «Dostyq», «Qainarbulaq» shaǵyn aýdandarynda osy kúni el igiligine berilgen 1200 oryndyq mektepterdi aralap kórdi. Bilim ordasynyń jumysymen tanysqan aimaq basshysy oqýshylardyń eńbekke baýlý kabinetterindegi erlerge arnalǵan sheberhanalar men qyzdardyń tigin tsehimen tanysty. Sondai-aq, saz balshyq sheberhanasynda da boldy. J.Qanseiituly uztazdarmen bolǵan áńgimede shákirtterdi jalpy bilim alýdan bólek, oqýshylarǵa tereńdetip bilim berip, túrli kásiptik bilim berý mamandyqtary – tigin tigý, temir ustasy sheberhanasy, qolóner jasaý syndy úiirmeler aiasynda arnaiy kýálikter berý jaǵyn oilastyrý qajettigin eske saldy. Bul rette, oblys basshysy Elbasynyń jastardy kásiptik bilim alýǵa kóptep baǵyttaý tapsyrmasy aiasynda berilgen osynaý kýálikterdiń artyqtyq etpeitinin eskertti. Ásirese, balalar tárbiesine alańdaǵan ákim mektep pen úidiń arasyndaǵy bailanys únemi ushtasyp, ata-anamen aradaǵy qatynasty bekemdeý arqyly tárbie, tazalyqqa qatysty birlesken jumystardyń uiymdastyrylýy kerektigin aitty.
Aita ketý kerek, búgingi alǵashqy Bilim kúni – 2017-2018 jańa oqý jyly óńirimizde 20 mekteptiń paidalanýǵa berilýimen erekshelenip otyr. El igiligine berilgen bilim mekemeleriniń 15-i «Nurly Jol» baǵdarlamasy boiynsha salynsa, qalǵany jergilikti biýdjet esebinen júrgizilgen.
Búgin jumysyn bastaǵan mektepterdiń 6-ýy jańadan ashylyp otyr. Nátijesinde óńirdegi orta mekteptiń sany 1021-den 1027-ge jetti. Atalǵan mektepterde oqý jylynda 640 myńǵa jýyq oqýshy bilim alsa, olardyń 73 myńy birinshi synypqa barady. Al shákirtterge oblysta 69 myńnan asa muǵalim bilim beredi.
Jyl sońyna deiin taǵy 9 bilim berý nysany el igiligine beriledi dep kútilýde. Osylaisha, óńirdegi 8 apatty jáne 12 úsh aýysymdy mektepterdiń máselesi sheshiledi deidi salaǵa jaýapty jetekshiler. Al qalǵan 23 mekteptiń qurylysy 2018-2019 jyldary júrgizilip, apatty jáne úsh aýysymdy bilim nysandarynyń máselesi túbegeili sheshimin tappaq.
Sondai-aq, aimaqtaǵy 2, 5, 7 synyp oqýshylary jańartylǵan bilim berý mazmunyna baǵyttalǵan jańa oqýlyqtarmen qamtamasyz etilip otyr.
