Ońtústik Qazaqstan oblysynyń ákimi Janseiit Túimebaev Túrkistan qalasyna jasaǵan jumys sapary barysynda qymyz ben shubattan qurǵaq sút ónimin óndiretin «Golden camel group LTD» kásipornynda boldy, dep habarlaidy "Ult aqparat".
Indýstrialdy aimaqta salynyp jatqan investitsiialyq joba keler jyldyń mamyr aiynda iske qosylady. Búginde nysan qurylysynyń 75 paiyzy aiaqtalǵan. Júrgizilip jatqan qurylystyń barysymen tanysqan oblys basshysy mundai zaýyt TMD elderinde balamasy joq ekenin aityp, bul jobanyń óńirúshin mańyzdy ekenine toqtaldy.
«Túie men bieniń sútinen qurǵaq ónim daiyndaityn zaýyttar oblys úshin óte tiimdi. Óitkeni óńirde túie sharýashylyǵy damityn bolady. Sondai-aq, jergilikti jurt jumyspen qamtylady. Bastysy, otandyq shipaly ónimdi shetelge eksporttaýǵa múmkindik týady», - dedi Janseiit Qanseiituly.
Quny 7,5 mlrd. teńgeni quraityn zaýyt bolashaqta jylyna 2500 tonna qurǵaq sút óndiretin bolady. Investitsiialyq joba iske qosylǵanda 150-den astam azamat jumyspen qamtylady dep josparlanýda. Aldaǵy ýaqytta munda ázirlengen daiyn ónimder respýblika naryǵynan bólek, Qytai, Saýd Arabiia, Gonkong elderine eksporttalatyn bolady.
Budan bólek, ákim osy jyldyń shilde aiynda iske qosylǵan Oranǵai aýyldyq okrýgindegi «Inar A.S.» jylyjai keshenin aralap kórip, qyzanaqtyń ónimdiligin baiqady. Aýmaǵy 0,5 gektardy quraityn jylyjaidan búginge deiin 20 tonna qyzanaq alynǵan. Alda 40 tonna shamasynda ónim beretin keshende qyzanaq pisýdiń aldynda tur. Kásipker Inara Namazbaevanyń aitýynsha, alǵashqy ónim Túrkistan bazaryna shyǵarylǵan. Quny 45 million teńgeni quraityn keshende 10 adam jumyspen qamtylǵan.
