Biyl Ońtústik Qazaqstan memlekettik pedagogikalyq institýtyna 80 jyl tolyp otyr. Osy aitýly dataǵa orai stýdentter murajaiy ashyldy. Sondai-aq oqý orny ýniversitet bolyp ózgerdi, dep habarlaidy Ult.kz tilshisi.
Talai talant túlep ushqan bilim ordasyndaǵy merekelik shara aiasynda stýdentter qalashyǵyndaǵy ǵimarattan «Ulttyq mura» stýdentter murajaiy saltanatty túrde ashyldy. Munda kóneniń kózi, urpaq sanasyna ulttyq dástúrdi sińiretin 100-ge jýyq eksponat qoiylǵan. Bul kúni sonymen qatar stýdentter jataqhanasynyń aldynan ashyq sport alańshasy paidalanýǵa berildi. 80 jyldyqqa orai taǵy 80 túp aǵash otyrǵyzyldy. Oǵan ýniversitet ujymy men baiyrǵy túlekter bolyp, barlyǵy bir kisidei atsalysty. Aitýly shara aiasynda ýniversitet ishinen «Kórkem ádebiet» ortalyǵy da ashyldy. Onda institýttyń damý tarihynda eńbegi sińgen Ázimhan Ospanuly men Kerimbek Syzdyqovtyń kitaptary qoiylǵan.
Budan bólek, «Sándik óner» ortalyǵy, «Nur Shańyraq» stýdentter teatrynyń tusaýy kesildi. Mereitoi barysynda halyqaralyq ǵylymi-teoriialyq konferentsiia, «Órkendegen Ońtústik» atty respýblikalyq aqyndar aitysy ótti.
Aita keteiik, irgeli oqý ornynyń irgetasy sonaý 1937 jyly qalandy. Alǵashqyda eki jyldyq muǵalimder institýty bolyp ashylyp, 4 kafedra ǵana jumys istedi. Institýttyń derbes ǵimaraty da bolmady. Ustazdar qaladaǵy mektepterdiń bólmelerinde dáris oqydy. Soǵan qaramastan, el mektepterine asa qajet bolǵan muǵalimderdi daiarlap shyǵardy. Toqsanynshy jyldardaǵy reformalaý kezinde kelbeti kómeskilenip, ataýy umyt bola bastady. Tek el táýelsizdiginiń 20 jyldyq mereili merekesiniń tusynda ǵana bilim ordasy qaita eńse tiktedi. Úkimet qaýlysymen óz aldyna derbes institýt bolyp quryldy. Búginde ordaly oqý ornyna ainaldy.
