Ońtústik Qazaqstan oblysy Sairam aýdany aimaǵyndaǵy Sibir jarasy oshaǵy kómindisin betondaý jumystaryna oblystyq biýdjet esebinen 101 mln teńge bólindi, dep habarlaidy ákimniń baspasóz qyzmeti.
Bul týraly OQO óńirlik kommýnikatsiialar qyzmetinde oblystyq tótenshe jaǵdailar departamenti basshysynyń orynbasary Batyrǵali Sopbekov pen oblys ákimi apparatynyń quqyq bóliminiń bas mamany Meiirkúl Batyrbekova ótkizgen baspasóz máslihatynda málim boldy.
Aita keteiik, Sairam aýdany Qaramurt aýyl okrýgi Jartóbe aýmaǵyndaǵy Aqsý ózeniniń jaǵalaýynda 1987 jyly Sibir jarasyn juqtyrǵan birneshe qara mal kómilgen bolatyn. Alaida ýaqyt óte kele Aqsý ózeniniń arnasy keńip, kómindige qaýip tóný faktisi anyqtalǵan. Naqtyraq aitsaq, kóktemgi sý tasqyny kezinde Aqsý ózeni sýy tasyp, ózen arnasyn qorǵaý maqsatynda salynǵan uzyndyǵy 200 metr, biiktigi 2 metrdei beton plitalary buzylǵan. Sondai aq, ózen arnasynan zańsyz shaǵal tas materialdaryn alý saldarynan Sibir jarasy oshaǵy kómindisiniń ashylyp ketý qaýpi týyndaǵan. Osyǵan bailanysty taiaýda tótenshe jaǵdailardyń aldyn alý jáne joiý jónindegi arnaiy komissiia qurylyp, atalǵan Sibir jarasy oshaǵy kómindisiniń búgingi ahýalyn qanaǵattanarlyqsyz dep tapty.
«Bizdiń departament tarapynan Sairam aýdanynyń ákimine tiisti is-sharalardy shuǵyl túrde atqarý maqsatynda Aqsý ózen arnasynyń boiynda zańsyz jumys júrgizip jatqan karer jumystaryn toqtatý týraly usynys joldandy. Sonymen qatar mal óleksesi kómilgen aýmaqta arna túzeý jáne jaǵa bekitý jumystaryn júrgizý týraly tiisti basqarmalarǵa naqty sharalar qabyldaý qajettigi týraly tapsyrmalar berildi», - dedi Batyrǵali Sársenbekuly.
Qazirgi tańda Sairam aýdan ákimdigimen tótenshe jaǵdaidy jariialaý týraly sheshim qabyldanyp, aýdan ákimi tarapynan merdiger tartylyp, tiisti jumystar júrgizilýde.
