Ońtústik Qazaqstan oblysynda 2017 jyly sheteldik jumys kúshin jumysqa tartýǵa 4983 birlik kvota bólingen. Kvota negizinde 88 kásiporyn men uiymda 3307 shetel azamattaryna ruqsat berildi. Búgin bul týraly OQO óńirlik kommýnikatsiialar qyzmetinde ótken brifingte oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Muhit Otarshiev málim etti, dep habarlaidy "Ult aqparat" óńirlik ákimdiktiń baspasóz qyzmetine silteme jasap.
Budan bólek, basqarma basshysynyń málimdeýinshe, 2017 jyly Pavlodar, Qostanai, Soltústik Qazaqstan oblystary ákimdikterimen memorandýmdar túzilip, oblystan 686 múshesi bar 163 otbasy qonys aýdarǵan.
«Bizdiń óńirden qonys aýdarǵan azamattar jermen, turaqty jumyspen jáne turǵyn úimen qamtamasyz etildi. Al «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasyn» iske asyrýǵa respýblikalyq biýdjetten 11429,8 mln. teńge bólinip, 64314 adam qamtylatyny kózdeldi. Sondai-aq, 2017 jyly 1500 adamdy kásipkerlik negizderge oqytýǵa, 813 adamdy shaǵyn nesieleýge qatystyrý josparlanyp, jalpy 2313 adamdy qamtýǵa 5823,4 mln.teńge qarjy qaraldy», - dedi Muhit Otarshiev.
Aita keteiik, «Órleý» jobasy aiasynda búginge deiin jalpy somasy 6 mlrd-tan astam teńge bolatyn shartty aqshalai kómekti 20 myńnan astam ońtústikqazaqstandyq alǵan. Aǵymdaǵy jyldyń Oblysta «Órleý» pilottyq jobasyn iske asyrý nátijesinde, shartty aqshalai kómek alýshylardyń tabysy 4,2 esege artyp, orta eseppen aiyna 1 adamǵa 23 myń teńgege jetip otyr.
