Biyl Ońtústik Qazaqstan oblysynda aýyl sharýashylyǵy eńbekkerleriniń kúnine arnalǵan mereke erekshe atalyp ótti. Buǵan sebepte bar. Óitkeni agrarly aimaqtyń sharýalary 376,5 mlrd teńgeni quraityn aýyl sharýashylyǵy ónimin óndirdi. Bul ótken jylǵymen salystyrǵanda 57 mlrd teńgege kóp. Iaǵni, diqandar biyl 400 myń tonnaǵa jýyq astyqty qambaǵa quisa, 116 myń tonna jemis-jidek pen 919 myń tonna kókónis, 295 myń tonna kartop, 1,3 mln tonna baqsha daqyldaryn jinady, dep habarlaidy OQO ákiminiń baspasóz qyzmeti.
Sondai-aq, aýyl sharýashylyǵy daqyldarynyń egis kólemi ótken jylmen salystyrǵanda 29 myń ga artyp, 818 myń ga qurady. Sonymen birge jańa bastamamen alǵash ret oblysta 59 ga jerge jańǵaq, 7 ga badamsha egildi. Al tamshylatyp sýǵarý ádisi 7,5 myń ga endirilip, jalpy kólemi 58,5 myń gektarǵa, jylyjailar 171 ga salynyp, jalpy 1 294 gektardan asty. Osynaý jetistiktiń bári óńirdegi eńbekqor sharýalardyń eren eńbegi dep bilemiz.Aýyl sharýashylyǵy salasynyń jetistikteri baiandalǵan merekege kelýshilerdi oblys ákimi Janseiit Túimebaev quttyqtap, biylǵy jyldyń óńir sharýalaryna berekeli bolǵanyn atap ótti.
Munan soń, aimaq basshysy túrli aýyl sharýashylyq ónimderin óndirýden I oryn alǵan ozat aýdan, qalalardy atap, arnaiy músin men oblys ákiminiń sertifikattaryn tabystady. Máselen, astyq óndirýde Qazyǵurt aýdanyna eshkim teń kelmese, sút óndirýden Sairam aýdany, maqsaryda Tólebi, maqta boiynsha Shardara aýdany bolsa, kókónis jinaýdan Saryaǵash aýdandary úzdik dep tanyldy. Al baqsha ónimderin jinaý boiynsha maqtaraldyqtar kósh bastasa, jemis-jidekte Túlkibas, ozyq investitsiialyq jobalardy iske asyrýda Báidibek aýdany, tamshylatyp sýǵarý tehnologiiasyn endirý boiynsha Túrkistan qalasy ie bolsa, «Sybaǵa», «Altyn Asyq» baǵdarlamasynyń oryndalýy jóninen otyrarlyqtar erledi.
Ońtústik Qazaqstan oblysyndaǵy mal sharýashylyǵy salasynyń eńbekkerleri de biylǵy jyldy tolaǵai tabystarmen aiaqtap otyr. Óitkeni óńirde iri qara mal sany ótken jylmen salystyrǵanda 5,8 paiyzǵa, qoi men eshki 1 paiyzǵa, jylqy 19,5 paiyzǵa artqan. Óńirdegi mal basynyń ósýine «Sybaǵa» baǵdarlamasy da óz septigin tigizip otyr. Atalǵan baǵdarlamamen biyldyń ózinde 13 087 bas mal satyp alynsa, «Altyn asyq» aiasynda 23 352 bas qoi, «Qulan» baǵdarlamasy aiasynda 2 366 bas jylqy satyp alynǵan. Mal basyn satyp alýda Ońtústik óńiri respýblikada 1 orynnan kórindi. Sondai-aq biyl oblysymyzda jańadan 2 419 shaǵyn bordaqylaý alań men 656 januialyq sút jáne 22 otbasylyq qus fermasy, 10 balyq sharýashylyǵy iske qosylǵan.
Osyndai jetistikke jetken eńbek ieleriniń erligine qurmetpen qaraý maqsatynda kúzgi merekeni «AGROFEST-2017» aýyl sharýashylyǵy festivali túrinde aiyryqsha atap ótý oblys ákiminiń bastamasymen qolǵa alynyp otyr. Óitkeni Ońtústik Qazaqstan oblysy agrarly baǵytta qalyptasyp, respýblikany ǵana emes, sheteldi de óziniń erekshe ónimderimen tańqaldyryp keledi. Tabiǵattyń tórt mezgili tepe-teń saqtalyp, kún nuryna bólengen ónegeli ólkede tógilgen adal terdiń bir tamshysy da eleýsiz ketpek emes.
