Búgin Ońtústik Qazaqstanda «Qazaqstannyń jańǵyrýy 3.0 – bilimniń úlesi» oblystyq pedagogikalyq tamyz konferentsiiasy ótti. Sharaǵa oblys ákimi J.Túimebaev qatysyp, eń aldymen, oblystaǵy aýdan, qalalardaǵy mektepterdiń jyl boiǵy atqarǵan jumystary men jetistikteri pash etilgen interaktivti taqtaly kórmeni tamashalady, - dep habarlaidy OQO ákiminiń baspasóz qyzmeti.
Saladaǵy máseleler jan-jaqty talqylanatyn jyl saiynǵy dástúrli sharaǵa QR Bilim jáne ǵylym ministrliginiń ókili, oblystyq máslihat depýtattary men basqarma basshylary, aýdan, qala ákimderi, jalpy bilim salasyna qatysty qurylymdardyń jetekshileri syndy 800-den astam adam qatysty.
Eń aldymen, konferentsiiada oblystyq bilim basqarmasynyń basshysy Isatai Saǵyndyqov bilim salasyndaǵy jetistikter men alda atqarylatyn jumystar jaiyn baiandady.
Atap aitqanda, biyl bilim salasyn qarjylandyrýǵa oblystyq biýdjetten 257,6 mlrd. teńge bólinip, ótken jylmen salystyrǵanda 19 mlrd. teńgege artyp otyr. Munan bólek, osy jyly 31,2 mlrd. teńgege 79 bilim nysanynyń qurylysy júrgizilip jatsa, onyń 29 bilim nysany jyl sońyna aiaqtalyp, paidalanýǵa beriledi.
2016 jyly apatty jáne úsh aýysymdy 43 mektep bolǵan edi. Aǵymdaǵy jyly 20 mekteptiń qurylysy tapsyrylady, al qalǵan 23 mekteptiń qurylysyn 2018-2019 jyldary aiaqtaý jospary iske asa bastady. Mektepke deiingi tárbie men oqytý uiymdary ótken oqý jylymen salystyrǵanda 95 birlikke (jekemenshik – 93 balabaqsha, 3 shaǵyn ortalyq) artyp, bala baqshaǵa kezekke turǵan 3-6 jastaǵy balalar sany 43 myńnan 28 myńǵa azaidy.
Memlekettik baǵdarlamaǵa sáikes mektep oqýshylary tegin oqýlyqtarmen qamtamasyz etilýde. Oblys boiynsha osy oqýlyqtarǵa jalpy 4,5 mlrd. teńge bólinip, ótken jylmen salystyrǵanda 1,8 mlrd. teńgege ósti.
Jiyn barysynda sóz alǵan oblys basshysy óńir pedagogtaryn jańa oqý jylymen quttyqtap, Elbasynyń rýhani jańǵyrý baǵdarlamasynda aitylǵan bilim salasyna qatysty júktegen mindetterge toqtaldy.
«Búgingi tamyz keńesi – bilim berý isindegi jeńisterimiz ben kemshilikterdi saralaityn aishyqty alań jáne aldymyzda turǵan mindetterdi pysyqtaityn mańyzdy basqosý. Elbasy Nursultan Ábishuly Nazarbaev «Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatar¬ynda bilim árdaiym birinshi orynda turýy shart. Sebebi, qundylyqtar júiesinde bilimdi bárinen biik qoiatyn ult qana tabysqa jetedi.» - degen bolatyn. Sondyqtan da búgingi tań – bilim berý mazmunyna, oqýshy men pedagog tulǵasyna jáne qyzmetine degen kózqarastar túbegeili ózgeriske bet buryp otyrǵan kúrdeli kezeń», - dedi J.Túimebaev.
Bilim berý salasyndaǵy jetistikterdi saralap bolǵan soń, aimaq ákimi saladaǵy kemshin túsip júrgen máselelerge de toqtaldy. Sapaly bilim berý jaittary men sýitsid, sybailas jemqorlyq salasyndaǵy ózekti máselelerdi sheshýdiń birqatar joldaryn nusqaǵan Janseiit Qanseiituly atalǵan problemalardy sheshýde óńir turǵyndarynyń da belsendi bolýy qajettigin jetkizdi.
Tamyz konferentsiiasynda bilim salasynda talai jyldardan beri úlgili qyzmet etip kele jatqan óńirdegi úsh ustazǵa – atap aitqanda, Shymkent qalasy, №39 M.Jumabaev atyndaǵy jalpy orta mektebiniń bastaýysh synyp muǵalimi Ainur Dúisebekovaǵa, Shymkent qalasy, №66 Qazyǵurt jalpy orta mektebiniń informatika pániniń muǵalimi Janat Musaevaǵa jáne Túrkistan qalasy, №9 Nekrasov atyndaǵy gimnaziiasynyń qazaq tili páni muǵalimi Venera Batyrqulovaǵa páter kilti tabystaldy. Sonymen qatar, jiynda oblys ákiminiń Gramotasyna 5 padagog ie bolsa, 8 ustaz oblys basshysynyń Alǵys hatyn aldy. Qazaqstan Respýblikasy Bilim jáne ǵylym ministrliginiń nagradalary aiasynda 5 muǵalim «Y.Altynsarin» tósbelgisin, 5 ustaz «Bilim berý isiniń qurmetti qyzmetkeri» tósbelgisin, 4 sala qyzmetkerli «Qurmet gramotasyn» jáne 4 muǵalimge «Alǵys haty» buiyrdy.
Aita ketý kerek, óńirde qazirgi tańda 69 myńnan asa muǵalim bilim beredi. 2017-2018 jańa oqý jylyna 640 myńǵa jýyq oqýshy keledi, iaǵni ótken jylmen salystyrǵanda 28 myńǵa (2016j.-611318) ósedi degen sóz. Onyń ishinde, 1-synypqa baratyn balalar sany 73691 balany qurap otyr. Jalpy óńir boiynsha 1036 mektep bar, onyń ishinde 7-eýi jeke menshik.
