Ońtústik Qazaqstan oblysynda turmysta jasalǵan qylmystardyń aldyn alý maqsatynda «Turmys» jedel-profilaktikalyq is-sharasy ótti. Sondai-aq «Otbasyndaǵy zorlyq-zombylyqsyz Qazaqstan» pilottyq jobasy aiasynda aktsiialar uiymdastyryldy. Nátijesinde otbasy-turmystyq saladaǵy qylmystar 5,9 paiyzǵa tómendedi. Búgin bul týraly OQO óńirlik kommýnikatsiialar qyzmetinde ótken brifingte oblystyq jergilikti politsiia qyzmetiniń bastyǵy Ábdiǵani Seidýaliev málim etti, dep habarlaidy "Ult aqparat" aimaq basshysynyń baspasóz qyzmetine silteme jasap.
Ábdiǵani Seidýalievtiń sózinshe, qoǵamdyq oryndarda jasalǵan qylmystar 26,4 paiyzǵa, al kóshede jasalǵan qylmystar 32,9 paiyzǵa tómendegen. Jalpy bótenniń múlkin urlaý qylmystary 12,4 paiyzǵa, mal urlyǵy qylmystary 18,8 paiyzǵa kemigen.
«Jol-kólik oqiǵalaryn aldyn alý, sondai-aq oblys avtojoldarynda qalyptasqan jedel jaǵdaidy jaqsartý, avtoapattylyq deńgeiin azaitý, aýyrtpashylyqty tómendetý maqsatynda, aǵymdaǵy jyly oblys aýmaǵynda «Qaýipsiz jol», «Jaiaý júrginshi», «Abailańyz balalar», «Avtobýs», «Mas júrgizýshi-qylmysker» jedel-profilaktikalyq is-sharalary ótkizilip, óz jalǵasyn tabýda», - dedi Ábdiǵani Toishyuly.
Al, profilaktikalyq sharalardyń nátijesinde oblys aýmaǵyndaǵy joldarda oryn alǵan jol kólik oqiǵalary 5,9 paiyzǵa tómendegen. Alaida oblystyq jáne jergilikti mańyzdy avtojoldarda bolǵan 801 JKO-nyń saldarynan 142 tulǵa qaza taýyp, 1133 tulǵa ártúrli dene jaraqat alǵan.
Budan bólek, tabiǵatty qorǵaý salasy boiynsha 170 qylmystyq ister qozǵalyp, 624 ákimshilik quqyqbuzýshylyq jáitteri anyqtalǵan. OQO IID Jergilikti politsiia qyzmetiniń qurylymdary múddeli memlekettik organdarmen birlese otyryp «Tabiǵat», «Qyzǵaldaq», «Ýyldyryq», «Jer qoinaýy» syndy aldyn alý is-sharalaryn uiymdastyryp keledi.
