Ońtústik Qazaqstan oblysy ákimdiginiń májilis zalynda Eńbek jáne halyqty áleýmettik qorǵaý vitse-ministri Svetlana Jaqypovanyń qatysýymen jańa formattaǵy ataýly áleýmettik kómek kórsetý boiynsha tiisti mekemelerdiń daiyndyq barysy talqylandy.
Basqosýda sóz alǵan oblystyq jumyspen qamtý jáne áleýmettik baǵdarlamalar basqarmasynyń basshysy Muhit Otarshiev 2018 jyly jańa formattaǵy ataýly áleýmettik kómek 300 myńǵa jýyq adamǵa kórsetiletinin jetkizd, dep habarlaidy oblys ákiminiń baspasóz qyzmeti.
«Biyl oblysymyzda «Órleý» jobasyn iske asyrý úshin 22,8 myń otbasy shartty aqshalai kómekpen jáne 27,3 myń adamdy jumyspen qamtý josparlanǵan bolatyn. Eger 2016 jyly oblystaǵy «Órleý» jobasyna qatysýshylardyń sany 26,3 paiyzdy qurasa, 2017 jyly josparlanǵan kórsetkish 75,2 paiyzǵa deiin artqan. Sondai-aq, búgingi tańda oblysta 260 otbasy ataýly áleýmettik kómek jáne 62,2 myń otbasy 18 jasqa deiingi balalarǵa arnalǵan járdemaqy alýda», - dedi Muhit Otarshiev.
Aita keteiik, 2017 jyldyń 1 qarashasyndaǵy esep boiynsha 118,9 myń adamǵa 7,2 mlrd teńgege shartty aqshalai kómek taǵaiyndalǵan. 2018 jyldyń 1 qańtardan bastap qazirgi usynatyn úsh túrli áleýmettik tólemderdiń ornyna ataýly áleýmettik kómektiń jańa formaty engizilmek. Jiynda sóz alǵan Eńbek jáne halyqty áleýmettik qorǵaý vitse-ministri Svetlana Jaqypova zeinetaqyny taǵaiyndaý júiesi ózgerip, tiisti áleýmettik kómekterdiń kólemi ulǵaiatynyn jetkizdi.
«2018 jyldyń 1 shildesinen bastap bazalyq zeinetaqy júiege qatysý ótiline qarai beriledi. Eger bul soma qazir 14 myń teńgeni kórsetse, 2018 jyldyń 1 shildesinen bastap zeinetkerlerdiń atalǵan toby yntymaqty jáne jinaqtaýshy zeinetaqyǵa qosa 28 myń teńgeni iemdenetin bolady. Al 2018 jyldyń 1 qańtarynan bastap az qamtylǵan otbasylar somasy kóbeigen járdemaqy alady dep josparlanýda. Atalǵan járdemaqy jumys istemeitin eńbekke jaramdy otbasy músheleri memleket usynǵan jumyspen qamtý sharalaryna qatysqanda ǵana tólenetin bolady», - dedi Svetlana Jaqypova.
Jiyn sońynda oblys ákiminiń orynbasary Erbol Sadyr zeinetaqy jáne járdemaqy salasyndaǵy jańa ózgerister jaily óńir halqyna túsindirý jumystaryn sala basshylaryna kúsheitýdi tapsyrdy.
