Búgin Ońtústik Qazaqstan oblysynda dástúrli halyqaralyq mamandandyrylǵan AgriTek Shymkent'2017 aýyl shashýashylyǵy kórmesi óz jumysyn bastady, dep habarlaidy oblystyq ákimdiktiń baspasóz qyzmeti.
Shymkent qalasyndaǵy «Kórme» ortalyǵynda úsh kún boiyna ótetin altynshy halyqaralyq mamandandyrylǵan kórmeniń ashylý saltanatyna qatysqan oblys ákimi Janseiit Túimebaev Ońtústik Qazaqstan oblysy aýyl sharýashylyǵy salasynda ekonomikanyń jańa draiverine ainalyp keletinin jetkizdi.
«Bul memlekettiń qoldaýy men sharýalardyń tynymsyz eńbeginiń jemisi. Oblystyń egin sharýashylyǵynda zamanaýi tehnologiialardy qoldaný jumysy qarqyndy túrde damyp keledi. Mysaly, búgingi tańǵa oblysymyzdy 2,8 myń ga qarqyndy baý bar, olardyń ónimdiligi 29,0 myń ga basqa baýǵa qaraǵanda 1,5-2 esege artyq. Sonymen qatar, oblysta 5 myń sharýashylyqqa tiesili 1,3 myń gektardan astam jylyjailar bar, onyń ishinde 17 birlik avtomattandyrylǵan óndiristik jylyjailar. Sonymen qatar sút baǵytynda jańa tehnologiialardy qoldaný belsendi túrde júrgizilýde. Zamanaýi qondyrǵylardyń arqasynda siyrdyń árbir basynan jylyna 7 myń litrge deiin sút alynady. Al tsifrlyq tehnologiiany qoldanýdyń nátijesinde qus etin óndirý 5 esege deiin artady», - dedi aimaq basshysy.
Búgingi kórmede Qazaqstannan bólek, Ońtústik Koreia, Resei, Túrkiia, Ózbekstan syndy sheteldik 50-den astam kompaniia ókilderi óz ónimderin usynyp otyr. Onda kelýshiler aýylsharýashylyq tehnikasy men jabdyqtaryn, qosalqy bólshekterdi, sýarý jáne tyńaitý tehnologiialaryn, jylyjailardy, tuqymdar men ekpelerdi, tyńaitqyshtardy, ósimdikterdi qorǵaý quraldaryn, mal sharýashylyǵyna arnalǵan tehnologiialardy, veterinarlyq tehnologiialardy kóre alady.
Halyqaralyq kórmede otandyq jáne sheteldik kompaniialar men kásiporyndar oblystyń agrarlyq saladaǵy jetistikterin kórsetip qana qoimai, olarmen iskerlik bailanysty nyǵaityp, ozyq tehnologiialar týraly paidaly maǵlumattar ala alady.
Dástúrge ainalǵan AgriTek Shymkent - 2017 kórmesi Qazaqstan men shet memleketterdiń agrarlyq saladaǵy jetistikterin odan ári molaita túsetin bolady.
Aita keteiik, jalpy aýyl sharýashylyǵy ónimderiniń sapasy men ónim kólemin arttyrý úshin biyl Ońtústiktiń sharýalary 900-den astam aýyl sharýashylyǵy tehnikalaryn satyp alǵan.
