Ońtústikte 2017 jyly 57 eldi meken kógildir otynmen qamtylady. Osy maqsatqa oblystyq biýdjetten 14,1 mlrd teńge jumsalatyn bolady. Bul týraly «Qazaqstan-Shymkent» telearnasynda tikelei efirde turǵyndardyń suraǵyna jaýap bergen Ońtústik Qazaqstan oblysynyń ákimi Janseiit Túimebaev málim etti.
Jalpy, oblysta 844 eldi mekenniń 300-i tabiǵi gazben qamtamasyz etilgen. Iaǵni bul óńirdiń 1 755 307 turǵyny kógildir otynǵa qol jetkizip otyr degen sóz.
«Oblystyń eldi mekenderin 2017-2020 jyldar aralyǵynda gazdandyrýdyń keshendi is-shara jospary ázirlendi. Josparǵa sáikes 2020 jylǵa qosymsha 383 eldi mekendi gazdandyrý josparlanyp otyr. 2021 jylǵa tabiǵi gazben qamtylǵan eldi mekender sanyn 683-ke nemese 2 mln. 720 myń turǵynǵa jetkizý mejelenip otyr»,- dedi Janseiit Qanseiituly.
Óńir basshysy turǵyndardyń aýyz sý máselesine qatysty suraqtaryna da jaýap berdi. Oblys ákiminiń aitýynsha, ólkemizdegi eldi mekender 73 paiyz aýyz sýmen qamtylǵan. Bul kórsetkish boiynsha óńir respýblikada 4-shi orynda. Arnaiy qabyldanǵan baǵdarlamaǵa sai aldaǵy jyldary 844 eldi mekenniń 701-i, iaǵni 83 paiyzy aýyz sýmen qamtylady.
Tikelei efir barysynda ákimge jol qurylysyna qatysty da saýaldar qoiyldy. Belgili bolǵandai, Ońtústik Qazaqstanda jyl sońyna deiin 569 nysan nemese 1452 shaqyrym jol men kóshe, 3 jaiaý júrginshiler ótkelderi jáne 19 kópir qurylys-jóndeý jumystarymen qamtylatyn bolady. Ol úshin biýdjetten 30 mlrd teńgege jýyq qarjy qaralǵan.
