Ońtústik Qazaqstan oblysynda 2017 jyly 17 myń pedagog biliktiligin arttyrdy. Sondai-aq, aýdandarda mobildi toptar qurylyp, oblystyń aldyńǵy qatarly muǵalimderi áriptesterine onlain rejiminde sabaq ótkizip, ozyq tájiribelerimen bólisýde. Bul týraly OQO óńirlik kommýnikatsiialar qyzmetinde ótken brifingte oblystyq bilim basqarmasynyń basshysy Isatai Saǵyndyqov málim etti, dep habarlaidy "Ult aqparat" aimaq basshysynyń baspasóz qyzmetine silteme jasap.
Onyń aitýynsha, óńirdegi 61 mektep biologiia, himiia, fizika jáne informatika pánderin aǵylshyn tilinde oqytýdy bastaǵan pilottyq mektepterdiń tizimine enip otyr. Sonymen qatar, oblys boiynsha 18 jasqa deiingi damý múmkindigi shekteýli bala sany 35 myńnan asqan. Oblysymyzda erekshe bilim berýdi qajet etetin balalarǵa arnalǵan arnaiy 12 mektep-internattar, 5 balabaqsha men keńes berý mekemeleri jáne ońaltý ortalyǵy qyzmet etedi.
«Sondai-aq, «Barshaǵa tegin kásiptik-tehnikalyq bilim» jobasy negizinde oblysta 2017-2018 oqý jylynda 75 myńǵa jýyq stýdent bilim alýda. Oblystyq biýdjet esebinen 91 mamandyq jáne 160 biliktilik boiynsha mamandar daiarlanýda. Atalǵan memlekettik baǵdarlama aiasynda kópbalaly otbasynan 3 myńǵa jýyq bala, 220 jetim bala jáne az qamtylǵan otbasynan 8 myńnan astam bala bilim alýda», - dedi Isatai Ómirzaquly.
Budan bólek, «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasynyń» birinshi baǵyty boiynsha 4 500-den astam stýdent 26 jumysshy mamandyqtary boiynsha oqýmen qamtylǵan.
Aita ketetini, bilim basqarmasy tarapynan oblystaǵy bilim berý uiymdarynyń basshylaryn taǵaiyndaý úshin arnaiy komissiia qurylyp otyr. Qazirgi tańda komissiiasynyń úsh otyrysy ótip, oǵan jalpy sany 131 úmitker qatysypty. Nátijesinde barlyq úmitkerdiń 120-sy zań talaptaryna sáikes keledi dep tanylsa, komissiia sheshimimen qalǵan 11 úmitkerdiń biliktilik talaptaryna sáikes kelmeitini anyqtalǵan.
