Qazyǵurt aýdanyndaǵy «Sapa - 2002» seriktestigi quny 275 mln teńge bolatyn mal bordaqylaý kesheniniń qurylysyn júrgizip jatyr. Munda salmaǵy 90-95 keli tartatyn qazaqtyń asyl tuqymdy qylshyq júndi quiryqty qoiy men merinos qoiy ósirlýde. Osyndai igi jumystardyń barysymen oblys ákimi Janseiit Túimebaev aýdanǵa jasaǵan jumys sapary kezinde tanysyp shyqty, dep Ult.kz tilshisi.
Sharýashylyqtyń jumysymen tanystyrǵan seriktestik basshysy Nurjan Áshirov et eksportyn damytýdy qolǵa alyp jatqanyn atap ótti.
Osy rette, Janseiit Túimebaev óńdeý ónerkásibine kóńil bólý kerektigin aityp, maldy tiridei satýdan bólek, onyń etin tereń óńdep satý máselesin de qolǵa alýdy usyndy.
«Túrli taǵamdarǵa arnaiy daiyndap, etti shetelge eksporttaýǵa bolady. Bul qai jaǵynan alyp qarasaq ta tiimdi», - degen óńir basshysy aýdan ákimine kásipkerlikti damytý baǵytyndaǵy jumystardy jalǵastyrýdy tapsyrdy.
Búginde munda quny 275 mln teńge bolatyn mal bordaqylaý kesheniniń qurylysy júrgizilip jatyr. Qazir onyń 170 milliony igerilip, 6,5 myń qoi siiatyn alańnyń qurylysy bitken.
«Sapa - 2002» JShS-niń basshysy Nurjan Áshirovtiń aitýynsha, búginde munda 4,5 myń qoi bordaqylanyp jatyr eken. Aldaǵy ýaqytta jylyna 1 myń tonna joǵary sapaly qoi etin óndirýdi maqsat etip otyrǵan sharýashylyq joba tolyq aiaqtalsa, bul keshende bir mezgilde 10 myń qoidy bordaqylaýǵa múmkindik týatynyn aitýda. Sondai-aq, mundaǵy qozy etine irandyqtar men arabtar qyzyǵýshylyq tanytsa, semiz qoilarǵa Ózbekstan elinen suranys bar kórinedi. Memlekettik qoldaýlar nátijesinde jańa tehnikalarǵa qol jetkizip kásibin órkendetip otyrǵanyn aitqan sharýashylyq iesi jumyspen 120 adamdy qamtyp otyrǵanyna toqtaldy.
Aita keteiik, «Sapa - 2002» JShS-de qoidan bólek, jylqy men iri qara da bar. Jalpy, mal basy 9 myńnan asqan. Maldyń jem-shóbi de osynda ázirlenedi. Sebebi «Sapa-2002» JShS mal sharýashylyǵymen qatar elitaly bidai, maqsary jáne jońyshqa tuqymyn óndirýmen ainalysady. Ósimdik maiyn shyǵaratyn tsehy da jumys isteidi.
