Jyl sońyna deiin oblysymyzdaǵy barlyq densaýlyq saqtaý uiymdarynda meditsinalyq aqparattandyrý júiesi 100 paiyz ornatylatyn bolady. Atalǵan júie densaýlyq saqtaý uiymdarynyń jumystaryn avtomattandyrýdy, qajetti emhanalyq jáne ákimshilik aqparat qurýdy jáne qaǵazsyz tehnologiialarǵa kezeń-kezeńmen kóshýdi qamtamasyz etedi. Búgin bul týraly Shymkent qalalyq №6 emhana jumysymen tanysqan Ońtústik Qazaqstan oblysynyń ákimi Janseiit Túimebaev málim etti.
Aita keteiik, keshendi meditsinalyq aqparattyq júiesi oblysymyzda 2017 jyldyń 1 aqpanynan bastap jumys istep keledi. Qazirgi tańda atalǵan jańa júie oblystyń ambýlatorlyq-emhanalyq jáne 38 meditsinalyq uiymdary men bólimshelerinde ornatylǵan. Atalǵan pilottyq júiege statsionarlyq qyzmet kórsetetin uiymdar da qosylyp, júieni tirajdaý máselesin jyl sońyna deiin aiaqtaý josparlanyp otyr.
«Oblysymyzdyń densaýlyq saqtaý salasy kúnnen-kúnge erekshe qarqynmen damyp keledi. Qazirgi tańda meditsinalyq kómekti jaqsartý maqsatynda oblysmyzdaǵy barlyq densaýlyq saqtaý uiymdaryna meditsinalyq aqparattandyrý júiesin ornatý ústindemiz. Sonymen qatar, osy baǵytta meditsinalyq uiymdardy 2017 jyly tolyq kompiýtermen jabdyqtaý josparlanyp otyr. Bul júieniń tiimdiligi mol. Sondyqtan jańashyldyqqa umtylýdan qoryqpai, halyqtyń densaýlyǵyn jaqsartýda árqaisymyz aianbai eńbek etýimiz kerek», - dedi Janseiit Qanseiituly.
«Damý» aqparattyq tehnologiialyq ortalyǵy ázirlegen joba – «DamuMed» keshendi meditsinalyq aqparattyq júiesi dep atalady. Atalǵan óńirlik júie meditsinalyq uiymdarda ishki protsessti avtomattandyryp qana qoimai, meditsinalyq kómek kórsetý deńgeileriniń bir-birimen integratsiiasyn, onkologiia, týberkýlez, kardiologiialyq arnaiy qyzmetterdiń shuǵyl sabaqtastyǵyn qamtamasyz ete alady.
