Ońtústik Qazaqstan oblysynda «Baqytty otbasy» baiqaýy ótti. Tólebi aýdanynyń belsendi jastary uiymdastyrǵan saiysqa 11 januia músheleri qatysty, dep habarlaidy "Ult aqparat" QazAqparat agenttigine silteme jasap.
Qatysýshylar baiqaý barysynda kópshilikke ónegeli otbasyda ǵana úlgili urpaq ósetinin jetkizýge tyrysty. Otbasylyq saiys 8 kezeńdi qamtydy. Baiqaýda halqymyzdyń qanyna sińgen, súiegine ótken, ulttyq kodymyz bolar salt-dástúrler jańǵyrdy.
«Negizgi maqsatymyz - otbasyndaǵy yntymaq, birlik, qundylyqtar, tatýlyq, syilastyqty damytý boldy. Aldyńǵy jyly bul saiys sporttyq is-shara retinde ótetin. Bul jyly mádeni ónerimen shyńdalý úshin sahnada ótkizip jatyrmyz. Ár úi óz otaýynda ornaǵan shattyq syrymen bólisti», - deidi Tólebi aýdandyq Jastar resýrstyq ortalyǵynyń basshysy Qairat Qypshaqov.
Ózara tartysty ótken saiysta árbir qatysýshy komandasy úshin baryn saldy. Qai otbasynyń birliginiń bekemdigi, yrysy tasqany, mereii asqany da jarys barysynda belgili boldy. Taǵylymdy sharada otbasy músheleriniń sporttyq ónerimen birge, bala tárbieleýdegi biliktiligi de baǵalandy.
«Balalardy sahnaǵa shyńdap, ónerge beiimdep, otbasylyq jylýlyqty jastaiynan sezinip ósse deimiz. Elbasymyz maqalasynda aitqan, balalardy bilimdi, bilikti, otbasylyq qundylyqtardy dáripteý, jeke tulǵany daiarlaý maqsatynda jumys jasap jatyrmyz», - deidi Ryspaevtar áýletiniń otanasy.
Baiqaý nátijesi boiynsha bas júldeni Satybaldievter otbasy jeńip aldy. Al, birinshi oryndy Siqymbaevtar áýleti ielense, ekinshi oryndy Ryspaevtar shańyraǵy mise tutty. Qalǵan qatysýshalar ár túrli nominatsiialar boiynsha yntalandyrý syilyqtaryna ie boldy.
