Keler jyldan bastap ataýly áleýmettik kómek formaty ózgeredi. Osy rette Ońtústik Qazaqstan oblystyq jumyspen qamtýdy úilestirý jáne áleýmettik baǵdarlamalar basqarmasynyń ókilderi osynaý jańalyqty halyqqa túsindirý jumystaryn bastap ketti, dep habarlaidy "Ult aqparat" aimaq basshysynyń baspasóz qyzmetine silteme jasap.
Qazirdiń ózinde Sairam, Tólebi aýdandarynyń salaǵa jaýapty qyzmetkerleri oqytý seminarynan ótken. Endi olar ataýly áleýmettik kómek kórsetý tártibiniń ózgeristerin halyqqa jan-jaqty túsindirip beretin bolady.
Jańasha ataýly áleýmettik kómekti taǵaiyndaýdaǵy basty maqsat - halyqty jalqaýlyqtan aryltyp, járdemge muqtajadardy kedeishilik qursaýynan shyǵarý bolyp tabylady. Bul kómek tabysy eń tómengi kúnkóris deńgeiiniń 50 paiyzynan tómen otbasylar men azamattarǵa shartsyz nemese shartty aqshalai kómek túrinde taǵaiyndalady. Shartsyz aqshalai kómek eńbekke qabiletti músheleri joq otbasylarǵa tiesili bolady. Al shartty aqshalai kómek jumysqa qabiletti kem degende bir múshesi bar az qamtylǵan otbasylarǵa usynylady. Alaida bul rette olar jumyspen qamtýdyń belsendi sharalaryna mindetti túrde qatystyrylady. Áleýmettik kelisimshartqa qol qoia otyryp, taraptar ózara mindetter alady. Áleýmettik qyzmetter – jumyspen qamtýǵa járdemdesýge kúsh salýǵa jáne tólemderdi tóleýge, al otbasynyń eńbekke qabiletti músheleri – otbasyn az qamtylǵan top quramynan shyǵarýǵa baǵyttalǵan áleýmettik beiimdeý men jumyspen qamtýǵa járdemdesý sharalaryna adal qatysýǵa mindettenedi.
«Jańasha format turǵynǵa jai aqshalai kómek berilip qana qoimai, onyń jumysqa turýyna qoldaý kórsetýge múmkindik beredi. Túrli qaita daiarlaý jáne biliktiligin arttyrý kýrstaryna jiberilip, shaǵyn nesie de beriledi. Osylaisha, otbasynyń kedeishilik sheginen shyǵýǵa áleýeti yntalandyrylady. Al osynaý keshendi sharalardy júzege asyrý úshin basqarmaǵa baǵynysty mekemelerdiń materialdyq-tehnikalyq múmkindikterin kúsheitý qajet»,- deidi oblystyq halyqty jumyspen qamtýdy úilestirý jáne áleýmettik baǵdarlamalar basqarmasynyń basshysy Muhit Otarshiev.
Ol sondai-aq, kóp qujattamalardyń elektrondy túrde júrgiziletinin jetkizip, jergilikti bilik ókilderine osy máseleni myqtap qolǵa alý qajettigin atap ótti.
Aita keteiik, ataýly áleýmettik kómek kórsetýdiń jańa tásilderi «Órleý» jobasy aiasynda synaqtan ótkizile otyryp, óziniń tiimdiligin kórsetti. Oblysta osyǵan deiin quramynda 100 myńnan asa adamy bar 20 myńdai otbasy osynaý kómekke qol jetkizipti. Onyń ishinde jobanyń 22 myńnan asa eńbekke qabiletti múshesi jumyspen qamtýdyń belsendi sharalaryna qatysqan. Bul jobaǵa qatysýshylardyń tabysynyń 4,2 esege deiin ósýine múmkindik berdi. Kóńil qýantarlyǵy sol, bul baǵyttaǵy sharalardy iske asyrýda oblys búginde respýblikada kósh bastap tur.
