Ońtústik Qazaqstan oblysynda Qazaqstan halqy Assambleiasynyń músheleri Maqtaral aýdanynyń jastarymen kezdesti. Aýdandyq mádeniet úiinde ótken jiynǵa oblystyq Qazaqstan halqy Assambleiasy tóraǵasynyń orynbasary Muratáli Qalmuratov pen aýdan ákiminiń orynbasary Maqsat Joldasbekov jáne jastary qatysty, dep habarlaidy "Ult aqparat".
Erkin formatta ótken jiynǵa aýdandyq prokýratýranyń qyzmetkerleri men aýdandyq Qoǵamdyq kelisim keńesiniń tóraǵasy, aýdan ákimdigine qarasty bólimderdiń basshylary men etnomádeni birlestikter janyndaǵy jastar qanattarynyń músheleri de shaqyryldy. Basqosýda Elbasynyń «Bolashaqqa baǵdar: rýhani jańǵyrý» maqalasyn nasihattaý jáne túsindirý, sonymen birge ony júzege asyrý, qazirgi jahandyq ózgerister jaǵdaiynda sanany jańǵyrtý jaiy keńinen sóz boldy.
«Turaqtylyq pen damý, tatýlyq pen dostyq - bárimizge ortaq qasterli qundylyqtar ári táýelsizdigimizdiń basty tiregi. Elimizde júrgizilgen saliqaly saiasattyń arqasynda birligi jarasqan, berekeli elde ǵumyr keship jatyrmyz. Tynyshtyǵy buzylǵan elderde ne bolyp jatqanyn ózderińiz bilip otyrsyzdar. Ǵasyrlar boiy qol jetkizgen jetistikteri áp-sátte kúl-talqan bolyp, qanshama adamdar opat bolýda. Sondyqtan, birtutas halyq bolyp, berekeli ǵumyr keshýdiń úlken baqyt ekenin umytpaýymyz tiis. Jastar osy joldy tabandy túrde jalǵastyryp, kózdiń qarashyǵyndai qorǵaýy kerek», - dedi jiynda sóz sóilegen oblystyq Qazaqstan halqy Assambleiasy tóraǵasynyń orynbasary Muratáli Qalmuratov.
Kezdesý barysynda «Turaqtylyq - tuǵyrymyz» taqyrybynda daiyndalǵan beinerolik kópshilik nazaryna usynyldy. Sondai-aq, jastar jumyspen qamtý, bilim, kásipkerlik, din máselelerine qatysy ózderiniń kókeilerinde júrgen saýaldardyn qoiyp, sala mamandarynan tushymdy jaýaptar aldy.
