Ońtústik Qazaqstan oblysynda Qazaqstannyń eńbek sińirgen óner qairatkeri, QR Memlekettik syilyǵynyń, Táýelsiz «Platinaly Tarlan» syilyǵynyń laýreaty, «Qurmet» ordeniniń iegeri, Kentaý qalasynyń birtýar týmasy Áshirbek Syǵaiǵa 70 jyl tolýyna orai eske alý keshi ótti, dep habarlaidy QazAqparat tilshisi.
Kentaý qalasynda ótken shara Memleket basshysynyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý aiasynda uiymdastyryldy. Aldymen Shámshi Qaldaiaqov atyndaǵy mádeniet saraiynda ortalyq kitaphana men Kentaý qalalyq mýzei tarapynan kórnekti teatr synshysyna arnalǵan kitap kórmesi uiymdastyryldy. Onan soń jiyn ótip, ony oblystyq mádeniet basqarma basshysynyń mindetin atqarýshy Asylbek emirhanov ashty. Jinalǵan qaýym aldynda sóz sóilegen basshy Áshirbek Syǵaidyń otbasyna oblys ákimi Janseiit Túimebaevtyń arnaiy quttyqtaýyn tapsyrdy. Keiinnen kópshilik «Ómir joly» atty beinefilm men teatr synshysynyń ómir jolyna arnalǵan eki kórinistik qoiylymdy tamashalady. Onyń ómiri men eńbekteri týraly aityp, aqyn-jazýshylardyń arnaýlary oqyldy. Qala ákimi Ábdibaqyt Maqulbaev teatr synshysynyń jasaǵan eńbekterin atap ótip, asyl jary Kúlásh Dýlatbekqyzy men uly Qanat Áshirbekulyna qurmet kórsetti.
«Áshirbek Tórebaiuly kózi tirisinde teatr, dramatýrgiia týraly 20-ǵa jýyq kitap, myńǵa tarta tamasha maqala jazǵan. Qazaq teatr synynda jańasha jol salǵan airyqsha tulǵa. Ol qazaq ónertanýshylary arasynda teatrdy óner retinde, ult úshin mańyzy bar qoǵamdyq qubylys retinde alǵash tanyǵan sarabdal synshy», - dedi Kentaý qalasynyń ákimi.
Jiynda Áshirbek Syǵaiǵa arnalǵan áýender men óleń joldary jinalǵan qaýymnyń janyn tebirentip, erekshe kúige bóledi. Marqumnyń zamandastary, aǵaiyn-týystary, dostary birtýar azamat týraly estelikterimen, qyzyqty áńgimelerimen bólisti. Saltanatty shara sońynda Áshirbek Syǵaidyń aýdarmasy «Júreiikshi júrek aýyrtpai» qoiylymy kórsetildi.
